Fur ruahtui tlak hmain Kikawn leh Chhingchhip inkar Blacktop hna zawh hman tum a ni

Keitum leh Baktawng inkar National Highway-54 siamthat leh laihzauh hna thawk mektu KRAM Infracon Pvt. Ltd. te chuan Serchhip Kikawn leh Chhingchhip inkar Blacktop hna chu kumin Fur ruahtui tlak hma ngeia zawh hman an tum thu an sawi.

Aizawl leh Tuipang inkar NH. 54 siamthat leh laihzauh hna thawh meka Package-II, Baktawng leh Keitum inkar (65 km to 125km) hna KRAM Infracon Pvt. Ltd. ten an thawh mek hi nimin khan Serchhip District MJA te chuan a hmunah kalin hnathawh dan leh an thlen chin te an zawtfiah a. He hunah hian KRAM Infracon Pvt. Ltd. hotute chuan an hnathawh mek chu December 2020-ah inbun tana hna an thawh thu sawiin, a tirah chuan kum 3 leh a chanve chhunga hna hi zofel tura ruahman a nih thu leh chumi ang chuan June 2023-a zo hman tura hma an lak thu an sawi a. Amaherawh chu COVID-19 hri leng avanga harsatna nasa tak an tawh thu leh a bikin hnathawktu chawkluhna leh bungrua lakluhna kawngah harsatna an tawh thu an sawi a. An hnathawh turah hian kawngpui laihzauh leh tihzauh bakah Blacktop leh Side drain siam te a tel thu sawiin, Retaining Wall siam tur pawh a tel thu sawiin, tunah hian kawng laih tur atanga zaa 90 aia tam mah an zawh tawh thu leh Blacktop hna pawh hmun tam takah thawkin KM 22 vel an blacktop tawh thu an sawi a. Hei bakah hian kawngpui tam zawkah chuan GSB an phah tawh thu sawiin, kumin Fur ruahtui tlak hma ngeiin Serchhip Kikawn leh Chhingchhip inkar (75km - 95km) Blacktop hna chu zawh hman an tum thu an sawi a ni.

Kikawn leh Bukpui inkar kawngpui thui lo te la laihzauh loh chungchang LENKAWL zawhna chhangin, helai vela In nei te an la insenghawi loh avanga laih theih ala nih loh thu leh an insenghawi a nih chuan lai thei tura hmanrua an inchhawp reng thu an sawi a. An hnathawh tur huamchhung ah Compensation la felloh avanga hna thawh theihlohna hmun 9 a awm thu pawh sawiin, heng te hi Revenue Department lamin an tihfel leh compensation pek an nih thuai an beisei thu leh anni lam chuan a chak thei ang bera hna thawh an duh thu an sawi a ni.

Helai hmuna hnathawktute chuan Lung chungchanga LENKAWL zawhna chhangin an duh anga Lung chang tha an hmuh loh thu leh an hmuh phak tawka a tha ber erawh an lak thu an sawi a, tunah hian quarry pathum (3) atanga lung hi an lak thu sawiin, bungraw lakluh chungchang ah harsatna em em an tawk tawh lo tih an sawi a. Leimin leh chhan hrang hrang avanga an beisei leh duh anga hna an thawh chak theihloh thu pawh sawiin, amaherawh chu hmun hrang hrangah mi 200 velin hna an thawh reng thu an sawi a. An hnuaia hian Local Contractor engemaw zat an awm thu pawh sawiin, an hnathawh chungchangah harsatna a awm loh thu an sawi bawk.

By-pass road bakah kawngpui awmsa laih-zauh mek a leivung paih chungchang a zawhna pawh chhangin KRAM Infracon Pvt. Ltd. hotute chuan by-pass road bikah leivung paihna hmun thum an neih thu an sawi a. Mizoram chu tlangram a nih avangin leivung chu thlanglam ah a tlak awlsam thu an sawi a. MJA member te chuan leivung paihna hmun tam tak chu Serchhip khaw chawmna atana Tuikum lui lakna hnar a mi a nih avanga fimkhur a tul thu an sawi bawk a ni.

MJA Serchhip District member te hian Chhingchhip dai, Hmuntha peng-a KRAM Infracon Pvt. Ltd. te hnathawhna hmun atangin kawng siam mek hi tlawhin Chhiahtlang khawchhung helna (by-pass road) km 2.571 a thui siam mek chu an zawh bakah Kikawn atanga Serchhip helna km 11.829 a thui laih mek pawh Khawtetlang thleng an zawh bawk a, hei bakah hian helai by-pass road a tel Sailiamkawn bula Lei dawh hna thawh mek pawh a hmunah enin hnathawktu ten an hnathawh dan hrang hrangte an hrilhfiah a ni.