Thenzawl DFO huamchhunga ramsa vanga vanduaina tawk te ex-gratia Compensation hlan an ni

Thenzawl Forest Division huamchhunga ramsa avanga vanduaina tawk te hnenah nimin khan Ex-Gratia Compensation hlanna neih a ni a, Thenzawl DFO chuan Lo leh huan hal hun liam tawh mahse ramkang ala hlauhawm dawn chauh tih sawiin, mipuite chu fimkhur zui zel turin a chah bawk.

Thenzawl DFO Office Chamber-a Ex-Gratia Compensation hlanna hunah hian Thenzawl DFO Lalbiakchama Chawngthu chuan Wildlife avanga vanduaina tawk te hnenah sawrkar chuan zangnadawmna, Ex-Gratia Compensation hi a hlan thin tih sawiin, chutihrual chuan ramsa pelh avang emaw, an chhaihkawlh emaw avanga vanduaina tawk te hnenah erawh zangnadawmna hi pek theih a ni lo tih a sawi a, nungcha te humhalhna kawngah sawrkar hmalakna te mipuiin an thlawp that a tul thu a sawi bawk.

District Fire prevention Committee-a Member Secretary ni bawk Lalbiakchama Chawngthu chuan kumin a Lo hal hun bituk a zawh hnuah nikum lam aiin Serchhip District chhunga kangmei kan tichhuak tlem tih pawh sawiin, Lo leh huan hal ni tawh mah se ram kang ala hlauhawm dawn chauh thu leh mipuite kan fimkhur zui zel a tul thu a sawi a. Thenzawl DFO Office in an chhinchhiah danin kumin ah March 17, 2022 thlenga FSI Satellite in an Division huamchhunga Fire Point a hmuh zat chu 217 niin heng te hi a hmuna enfiah a nih hnuah Lo leh huan hal te a ni tlangpui tih a sawi a. Lo leh huan hal zau zawng hi 291.5 Ha. nia chhinchhiah a ni tih a sawi bawk.

Nimin-a Ex-Gratia hlanna hunah hian November 10, 2020-a Khuai zuk vanga boral Biaksanga, Sialsuk chhungte hnenah zangna-dawmna Rs. 2,00,000/- hlan niin Piangmawia, Hermon Veng Thenzawl chu Rul in a chuk avanga a in enkawlna senso Rs. 48,477/- hlan a nih bakah ramsa in an thlai a tihchhiat sak te hnenah Crop Damage Compensation pek an ni bawk.

Ramsa avanga nunna chan leh hliam tuar bakah thlai an tihchhiat sak te hian anmahni bialtu DFO/Forest Range Officer (RO) te kaltlangin zangnadawmna hi an dil thei a, heng dilna lut te hi enfiah a nih hnuah Chief Minister kaihhruai State Board for Wildlife in zangnadawmna pek tlak a ngaih te chu sawrkar in an tawrhna nasat dan a zirin zangnadawmna hi a pe thin a ni.