Bairabi-Sairang Rel kawng sial mek CS in a enfiah

Bairabi-Sairang Rel kawng sial mek ‘New BG Line from Bairabi to Sairang’ chhunga Sairang leh Khamrang inkara hna thawh mek te chu Inrinni khan Chief Secretary Dr. Renu Sharma chuan a hmunah kalin an hnathawh te a enfiah.

Chief Secretary hian Sairang Zero Point atangin hna thawh mekte hi enin, Khamrang thlenga leiverh (tunnel) te, Lei dawh (bridge) innghahna tura a dona ‘Pier’ chhun mek leh chhun zawh tawh te, Khamrang leh Mualkhang bula Lei dawh (bridge) chunga ‘Superstructure’ thir a Lei dawh rel mek, Rel tlanna tur dawh mek te, hmun thenkhata rel tlan na tur track sial mek te leh Sairang leh Mualkhang-a Rel Station building sak mek te chu a hmunah a tlawhin hna thlen chin te a endik a. Heng hmun hrang hrangah te hian Indian Railways hnuaia he hna viltu - Northeastern Frontier Railways-a Deputy Chief Engineer (Construction) Harjemal Meena leh Executive Engineer (Contruction) Malay Baruah te chuan an thlen chin leh an hmabak te Drawing leh Site Plan te hmangin Chief Secretary hi an hrilhfiah a ni.

Bairabi-Sairang Rel kawng hi Broad Gauge Railway Line tur a ni dawn a. RITES ten he Survey hna hi 2005 bawr khan an zofel a. Hna hi Sawrkar Laipuiin kum 2008-2009 khan sanction-in a tira estimate hi cheng vbc. 2384.34 a ni a. Hna thawh man hi revise zel niin tunah chuan he Rel kawng siam zawh nan hian cheng vbc. 6547 bawr vel senral a ngai dawn nia chhut a ni. A hna hi 2015-ah tan niin Railways Engineer he hna viltu te chuan November/December 2023-ah zawhfel beisei a nih thu leh za zelah 70 vel thawh zawh tawh a nih thu an sawi a ni.

Bairabi atanga in tanin Sairang huam telin Rel Station pali a awm dawn a. Chungte chu Bairabi atanga a hlat zawng tehin, KM16.38-ah Hortoki Rel Station; KM 26.10-ah Kawnpui Rel Station; KM 37.12-ah Mualkhang Rel Station leh a tawpna KM 51.38-ah Sairang Rel Station (Sihmui chak) te an ni a. Sairang Rel Station hi Terminal Station - Coaches maintenance na hmun tur anih dawn avangin Station dang 3 aia lian deuh zawk tura buatsaih mek a ni a. He Station-ah hian Passenger ten Rel an lo channa tur  Platform 3 awm tura ruahman a ni a. Line 7 : Passenger line 3, Bungraw phur (Goods Line) line 3 leh maintentance & Service line 1 lai a awm dawn a. Bungraw phur bik tan Goods Platform siam a ni ang.

He project atan Railways in ram hectare 481.18 a zau an hmang mek a. Kolasib District huamchhung ah Forest ram hectare 38.94 a zau leh Non-Forest Land mimal ram hectare 308.01 a zau leh Aizawl District-ah Forest ram hectare 35.547-a zau leh Non-Forest Land mimal ram hectare 98.595 zau an hmang a. Heng ah hian zangnadawmna cheng vbc.  840 bawr vel ram neitute pek an ni tawh a ni.