Serchhip-a Myanmar raltlan awm te tan Capacity Building Programme buatsaih a ni

Myanmar ram buaina avanga Mizoram-a raltlan rawn lut Serchhip District chhunga awm mek te tan tunlai hian Capacity Building Programe buatsaih niin raltlan te tan hian Dan leh hrai an hriat tur pawimawh te, Foreginer’s Act, 1946 leh Integrated Child Protection Scheme (ICPS) tih thupuite hmangin an tana hriattur pawimawh hrang hrangte hrilh an ni.

Deputy Commissioner’s Office, Serchhip District huaihawt-a Capacity Building Programme hi niminpiah khan Serchhip Chhim Veng-a Lalpuithanga Hall-ah Myanmar atanga raltlan Serchhip Chhim Veng, Dinthar leh Darnam Veng-a chengte pualin neih niin nimin khan Serchhip Hmar Veng Kohhran Sunday School Hall-ah Serchhip Hmar Veng, New Serchhip North leh Serchhip Field Veng a raltlan chengte an kalkhawm a ni.

Niminpiah a hun hman hi Serchhip Addl. DC leh Nodal Officer for Myanmar Refugees Lalmuansanga Ralte chuan hmanpuiin mahni khua leh an In leh lo chhuahsan ngai khawpa harsatna an tawk chu pawi a tih thu leh Mizoramah thlamuang taka awm tura an duh thu a hrilh a. Mizorama an awm chhungin ram dan pawimawh hriattur tam tak an neih avangin hetiang hun hi an buatsaih sak thu hrilhin, mahni khaw lama kir emaw District danga awmna sawn duh an awm anih chuan anmahni bialtu Village Council-te hriattira, an va insawnna tur District-a Deputy Commissioner hrilh hriat a ngaih avangin Deputy Commissioner, Serchhip hnena phalna lak hmasak phawt a ngaih thute pawh a hrilh a ni.

Nimin-a hun hman ah hian Serchhip SDO (Sadar) C. Laltleipuii chuan thenawm ram buai avanga raltlan te chungchang ngaihtuahin Mizoram sawrkar in District tina Deputy Commissioner te chu anmahni huamchhunga Myanmar raltlan te pualin hetiang hun hi buatsaih tura a tih angin he hun hi buatsaih a nih thu leh Mizoram-a an awm chhungin thlamuang taka awm turin a chah a, amaherawh chu dan leh thupek te an hriatchian a ngai a, anmahni himna atan hlei hlei a tangkai dawn th sawiin, he huna kalkhawm te chu an chhung leh khat bakah an thiante pawh inhrilhchhawng zel turin a chah a ni.

Capacity Building Programme hi Sub- Deputy Commissioner F. Lalnisai huan kaihruaiin Serchhip-a Police hotu ten Dan leh Hrai hriattur pawimawh leh Foreigner’s Act, 1946 an sawifiah a, District Child Protection Unit atangin Integrated Child Protection Scheme (ICPS) hnuaia hriattur pawimawh te sawifiah a ni bawk.