Hna thawk zo lovin sum pekchhuah niin sawi

Tunhnaia Comptroller and Auditor General of India (CAG) Audit Report chuan Mizoram States Sports Council (MSSC)-in cheng nuai 80 chuang senga infiamna hmun 3 a siamah hna thawk zo lo chungin pawisa a pechhuak tih a sawi.

CAG report-in a sawi dan chuan Mualpui a Indoor Stadium (R. Dengthuama Indoor Stadium), Electric Veng a Indoor Stadium leh ITI Veng-a Aquatic Complex-ah te hna thawh zawh hma-in a vaiin Rs. 80,31,000/- zet chu MSSC hian a pe tla vek a. Mualpui Stadium-ah hian cheng nuai 42 thelh sen belh tura tih chu kum 2017 leh 2018 khan pawisa pek fel vek a ni tawh chungin a taka hnathawh a awm lo tih Audit chuan an hmuchhuak a ni. Electric Veng-a Indoor Stadium pawh hi cheng nuai 430 chuang senga June 2018-a sak zawh vek tawh angin MSSC hian an report a. Mahse Auditor-te’n a hmuna an endik chuan kawng-án leh chhawng khatna hi Beam leh Slab bak engmah hmuh tur a awm lo niin an sawi a. New Economic Development Policy (NEDP) sum cheng nuai 40 hmangin PWD-in an sa zawm niin an sawi.

ITI Veng-a Aquatic Complex, cheng nuai 80 senga sakah hian tuihleuh thiamte zuanthlakna tur dawhsan pakhat siam belhna atan cheng nuai 9 ruahman a ni a. Auditor-te’n an endiknaah he zuanthlakna dawhsan hi siam a ni lo tih an hmuh thu an sawi a. CAG chuan a mawhphurtu Officer zawn chhuah a hrem ni se tiin rawtna a siam a  ni.