Hri kai enkawllai sang hnih aiin an tlem tawh

Niminpiah khan Mizoram-ah Sample 3833 enfiah leh niin heng atang hian COVID-19 hri kai mi 239 hmuhchhuah an ni a, Sample enfiah atanga za zela 6.24 te chuan hri an kai a, Mizoram-a hri enkawllai pawh mi sang hnih chuang hret chauh an ni tawh a ni.

Mizoram-ah COVID-19 hri kai hmuhchhuah thar an tlem zel a, niminpiah khan ZMC-a RT-PCR Laboratory-ah Sample 48 enfiah niin heng atang hian hri kai mi 4 hmuh an ni a, Lunglei-a RT-PCR Laboratory-ah Sample enfiah a awm lo thung a. Fluorescent Immunoassay Test hmangin Aizawl-ah Sample 17 enfiah niin hri kai mi pakhat hmuh a ni bawk.

District 6-a TrueNat Laboratory-ah niminpiah khan Sample 41 enfiah niin heng atang hian hri kai mi 14 hmuh an ni bawk a, an zinga mi 7 te chu Champhai District-a hri kai hmuh te niin Hnahthial District-ah hri kai mi 4 hmuh an ni a, Serchhip District-ah hri kai mi 2 leh Aizawl District-ah hri kai mi pakhat hmuh an ni bawk.

Rapid Antigen Test hmangin niminpiah khan Sample 3705 enfiah ni bawkin hri kai mi 220 hmuh an ni bawk a, Aizawl District-ah hri kai mi 49 hmuh niin Saitual District-ah 36, Lunglei District-ah 27, Mamit District-ah 24, Khawzawl District-ah 23, Serchhip District-ah 22, Lawngtlai District-ah 16, Champhai District-ah 13, Siaha leh Hnahthial District-ah hri kai mi 5 ve ve hmuh an ni bawk.

Nimin khan COVID-19 hri kai enkawl dam mi 481 lai an awm belh ve leh bawk a, heti hian nimin tlai thleng khan Mizoram-a hri kai hmuhchhuah tawh chu 2,21,977 niin an zinga 2,19,298 te chu enkawl dam an ni tawh a, za zela 98.8 te chu enkawl dam ni tawhin hri kai enkawllai 2005 an la awm a, hri kai zingah mi 674 an boral tawh a ni.