MPYCC in Lengpui Airport Renovation chhui turin Lokayukta-ah FIR/Complaint an thehlut

Mizoram Pradesh Youth Congress Committee (MPYCC) chuan tun thla ni 10 tlai-a Lengpui Airport Renovation lai a chim avanga a mawhphurtute chhui chiang turin nimin khan Mizoram Lokayukta Chairperson hnenah FIR/Complaint an thehlut.

Lokayukta-a FIR an thehluh chungchangah hian MPYCC President Dr. Lalmalsawma chuan vanduai thlak takin March 10, 2022 Zirtawpni tlai dar 4:30 vel khan Airport Renovation tur a hna an thawh mek chu slab an chhun laiin a chim tih sawiin, “A beam leh ban te tliak rem rumin a chhe hneh hle a ni,” a ti a. Mihring nunna chan an awm loh hlauh thu pawh sawiin, “A hmun ngeiah pawl hrang hrang ten an tlawh hnu-ah Contractor-in a hna a thawh dan a (sub-standard) tha tawk lo tih chu a hmawrbawkna a ni,” a ti a. Lengpui Airport renovation hna thawk tura Contractor-te thlan an nih danah sawi neuh neuh a tam hle nia sawiin, Budget-ah a pawisa tur sanction awm hma hauh leh Work Order pawh a chhuah hma in thla engemaw zat contractor in hna an thawk lawk tawh tih te sawi a nih thu a sawi a. “Chuvangin Works Contract an award danah te’n thil felhlel a tamin, corruption thuk takin a in rawlh ngei ni a rin theih a ni a. Loy Akuyta hian min chhui sak turin kan ngen,” a ti. MPYCC President chuan, “Mihring nunna a hlu a, khuti ringawt chuan nakin zelah mihring nunna a tan hlauhawm anih theih avangin uluk tak a chhui a ngai niin kan hria a, min chhui sak turin kan ngen,” a ti bawk.

Congress Thalai chuan Aviation hrim hrimah hian chhui tur a tam nia a lan thu pawh tarlangin, Aviation-a sum chingpen chungchangah Lok Ayukta-a Congress Thalai in complaint a thehluh pawh Lok Ayukta chuan CBI ko lut turin a ti tawh tih tarlangin, “Mahse kan hrawn lai mek sawrkar hian a dang char char nia hriat a ni. Khami case pawh chhui putling ngei turin Lokayukta-in CBI koh luh a rawt ngei angin kan sawrkar hian CBI ko lut ngei turin kan phut nawn,” an ti a ni.

MPYCC thuchhuah chuan Lok Ayukta Chairperson C. Lalsawta chuan nimin-a complaint an thehluh hi lo dawngin, 'Man power' a neih tlem zia leh hna thawh tak tak a harsat zia a leh hna an thawh theih tak tak nana tun aia thuam chak an ngaih zia a lo sawi bawk tih an sawi a. Case dangah pawh CBI kohluh tur an tih ngei pawh sawrkarin a koh luh duh miau loh avanga harsatna an tawh thu a sawi bawk tih MPYCC thuchhuah chuan an tarlang a ni.