Minister puhna chungchangah FIR thehluh a ni

Tunhnaia Social Media-ah Chamdur ramngaw Sanctuary-a mi Sele kahtir-a Minister Lalruatkima puhna chungchangah nimin khan Mizoram Police Cyber Crime Police Station-ah FIR thehluh a ni.

Nimin a MNF Party in thuchhuah siama an tarlan danin FIR hi Lalremruata Sailo, Dawrpui Vengthar chuan thehlutin he FIR-ah hian, “Tanpuia Zahthang (Laltanpuia Zahthang) Ph. 9862651240 chuan facebook Group-a a comment siamah diklo takin Pu Lalruatkima, Minister (MLA Aizawl West-II) chu Chamdur ram ngaw-a sanctuary-a mi Sele a kahtir tiin dawtin a puh a. Min bialtu MLA tihhmingchhiat tuma a puhna hi thudik lo leh dawt ngialngan tak a nih avangin hemi chungchangah hian a rang thei ang bera hma min laksak turin ka rawn ngen a che,” a ti a ni.

Nimin-a FIR thehluhna hunah hian Lalremruata Sailo hi MNF Legal Board chuan tawiawmin an Secretary David R. Lalsawmtluanga chuan Kristian ramah politics a nih avanga dawt leh thubelhchian dawllo hmanga Social Media kaltlanga ram hruaituten beih an tawk thin chu a pawi hle tih sawiin, thuneituten an phu tawk hremna pe ngei se an duh hle tih a sawi bawk.