Latest News

Chemical Fertilizer tel lova thlai thar tura hmalakna P&E Minister in fakawm a tih thu a sawi

P&E Minister R. Lalzirliana chuan Mission Foundation Movement (MFM) hmalakna hnuaia Chemical Fertilizer tello a thlai thar tura hmalakna chu fakawm a tih thu a sawi.

Thingsulthliah RD Block huam-chhunga Mission Foundation Movement (MFM)-in Organic Farming for Sustainable Agriculture Production Project beneficiary te hnena thlai chi leh bungrua hrang hrang semna hun nimin a an buatsaih a hmanpuina ah he thu hi sawiin P&E Minister chuan Mizoram, tui fim leh thianghlim tak luanna, ram dang tam takin an neih ve loh boruak thiang leh thlifim nuam tak lenna a cheng Zofate hian ramngaw kan thiah nasat avangin kan boruak te a inthlak nasa tawh hle tih a sawi a. Heng ti ziaawm tura Sustainable Organic Farming Project kalpui a ni chu lawmawm a tih thu a sawi a ni.

P&E Minister chuan Organic Farming chu khawvel in a buaipui mek, ram changkang leh mi hausa ten an ngaihhlut leh ngaihsan chhoh mek a ni tih sawiin, Chemical fertilizer te hmun hrang hrangah hman a lo nih tawh thin avang leh lui tui luang ten heng fertilizer te hi a ken darh ve thin bawk avangin Organic farming an kalpuina tur hmun te thlang fimkhur tur leh helai tlangdung in Organic Certificate an neih ngei theihna tur atan a dikna ngai pawimawh turin kalkhawm te a chah a ni.

Mission Foundation Movement hnuaia project kalpui mek hi Central Sector Scheme niin 100% Central funding a ni a. He Project hi RD Block pahnih (2), Thingsulthliah RD Block leh Reiek RD Block-ah te kalpui mek a ni. Thingsulthliah RD Block huamchhungah hian khaw hrang hrang pasarih (7) atangin beneficiary 75 te thlanchhuah an ni a. Heng beneficiary te hi MzSRLM hnuaia Self Help Group titha te atanga thlanchhuah niin a thawh khatna ah hian thlai chi hrang hrang Sweet Corn, Be, Vaimin leh Bawrhsaiabe bakah bungrua hrang hrang bawngtuthlawh, suahdur, tui pipe, chem leh pawisafai Rs. 3000/- theuh pek an ni.

Comments

Popular News (Last 30 Days)