Tuirihiau leh Vantawng Khawhthla inkara Lawngleng service tur MLA in a hawng

Khualzin te tlawh nasat Tuirihiau leh Vantawng Khawhthla inkar Vanva lui-a khualzin te chuan theihna tur Lawngleng Service chu nimin khan Serchhip bialtu MLA Lalduhoma chuan a hawng a, hemi atan hian bialtu MLA hian Lawngleng Engine hmang pahnih (2) chu Buangpui Branch YMA te hnenah a pe a ni.

Nimin a Lawngleng service hawnna hun Vanva lui-a neih ah bialtu MLA Lalduhoma chuan a bial chhungah khualzin te tana hmun tlawh manhla tak tak a awm thu leh chung tihchangtlun kawnga hmalakna awm thin te lawmawm a tih thu sawiin, heng khualzin te tlawh nasat hmun chu changtlung lehzuala, a theih anga chei zel tha a tih thu a sawi a, hmun hmingthang te chu khuanu siamsa, anihna ang anga humhalh tha tih thu pawh sawiin, “Tunah hian MUP ten Mizo In sak an mamawh thu an rawn thlen a, chu chu tihhlawhtlin sak an ni dawn a ni. Tin, MZP ten Library an mamawh thu an rawn thlen bawk a, hei pawh hi a rang thei ang berin kan ti hlawhtling bawk dawn a ni,” a ti a ni.

Lalduhoma chuan, helai hmun hi sawrkar laipui in an hriatpui tawh tih sawiin, Ministry of Tourism atangin khualzin hip tura Vantawng Khawhthla leh a vel cheina tur Project lian tak, cheng nuai engemawzat a awm tur thu leh Central Sawrkar in a approved tawh thu a sawi a, “Helai hmun hian mipui tam zawk a hip theih nan kan chei dawn a ni. Tunah Thenzawl-ah Golf Course te, Dilpui te leh Welness Center changtlung tak a awm tawh bawk a, helai bial hi Tourism hmunpui a la ni dawn a ni,” a ti bawk.

Serchhip Bialtu MLA chuan a bial chhunga hmasawnna hrang hrangte MLA Fund atanga a theih ang ang an thawh thin thu leh MLA Fund chauh hmanga duh anga hmasawnna hna thawh theih a ni lo tih hriaa, MLA Fund an hmuh ang ang lawm thiam taka a bial mipui ten an dawng thin leh tangkai taka an hmang thin chu lawmawm a tih thu a sawi bawk.

Tuirihiau leh Vantawng Khawhthla inkar Vanva Lui hi Kilometer khat leh a chanve (1.5km) vela thui niin Lawngleng hi Tuirihiau thlang atangin, Vantawng Khawhthla chung thleng Thalva ekchar lai leh Fur lai pawhin a kal theih beisei a ni a, Buangpui Branch YMA te chuan tunhnai khan helaia hman tur Lawngleng hi Bialtu MLA hnenah hian dilin, an dilna ang hian Lalduhoma chuan MLA Fund atangin Lawngleng hi pahnih (2) a lei sak a ni.

Buangpui Branch YMA hruaitute chuan Lawngleng petu Bialtu MLA Lalduhoma chungah lawmthu sawiin, Khualzin a duh apiang tan Lawngleng hi man chawia chuan theihin an kalpui nghal dawn tih an sawi a, Lawngleng pakhatah hian a khalhtu nen mi panga (5) zel chuan theih a ni dawn a, Tuirihiau atanga Vantawng Khawhthla chung thlenga chuankualna man hi mi pakhat tan Rs. 100/- zel a bithliah a nih thu an sawi.