FCI atanga buhfai dawn tipung turin ngen

Mizoram Rajya Sabha MP K. Vanlalvena chuan Mizoram in FCI atanga buhfai a dawn chu tipung turin sawrkar laipui chu a ngen.

Nimin-a Parliament Budget Session-ah Rajya Sabha MP K. Vanlalvena chuan Mizoram-in FCI atanga thlatin buhfai a dawn chu kan State mamawh zat chanve chauh a nih thu sawiin, a zatve dang chu Open Market atanga Mizoram sawrkar-in man to zawka a lei a ngaih thu a sawi a, FCI atanga kan buhfai dawn zat tipung turin Central sawrkar chu a ngen a ni. Rajya Sabha MP chuan North Eastern State hrang hranga FCI structure chu siam danglam a tul thu pawh sawiin, State 4 - Assam, Arunachal, Nagaland leh Manipur ten anmahni State-ah theuh FCI Regional Office an neih laiin State dang 3, Mizoram, Tripura leh Meghalaya ten NEF hnuaiah Office pakhat Shillong ami an intawm chu a dik lo a ni, a ti a. Heng State pathumte hian a hrang theuha mahni State-ah FCI Regional Office an neih a tul tih a sawi bawk.

Nimin Parliament Session-a K. Vanlalvena thusawi tan laiin Rajya Sabha Chairman leh Vice President M.Venkaiah Naidu chuan tunhnaia Mizoram a tlawh thu leh State Assembly-ah thu a sawi tih tarlangin, Mizoram Legislative Assembly chhunga rorelna kalpui dan chu buaina awm ve ngai lo, ram pum tan entawn tlak a ni, a ti a. MP chuan Rajya Sabha Chairman M.Venkaiah Naidu chu Mizoram a rawn tlawh avanga lawmthu hrilhin, lo kal leh ngei tura a beisei thu a sawi bawk a ni.