Hri kai enkawllai 231 awm

Serchhip District-ah COVID-19 hri kai enkawllai mi 231 an la awm mek.

Serchhip District-ah Zirtawpni-a hri kai chhinchhiah thar an awm loh hnuah Inrinni khan hri kai mi 81 zet an awm belh leh thung a, heng zinga 34 te hi Mualcheng khua niin Thenzawl-ah 16, Thentlang-ah 9, Chekawn-ah 7, Chhingchhip-ah 4, East Lung-dar-ah 3, New Serchhip South, Chhiahtlang leh Khawlailung-ah mi 2 theuh leh Serchhip Bazar Hnuai leh North Vanlaiphai-ah mi pakhat ve ve an ni. Nimin khan Serchhip District-ah hian hri kai hmuhchhuah thar chhinchhiah an awmlo bawk a ni.

Inrinni khan Serchhip District-ah hri kai enkawl dam mi 98 lai awm belhin nimin-ah hri kai enkawl dam an awm belh lova. Heti hian nimin thlenga Serchhip District-a hri kai hmuh tawh chu 12,879 niin an zinga 12,616 te chu enkawl dam an ni tawh a, hri kai hmuhchhuah te atanga chhutin za zela 97.95 te chu enkawl dam an ni tawh a, hri kai enkawllai 231 an la awm mek bawk a ni.

Hetihlai hian Zirtawpni zan dar 10:30 khan Rangkhumi (75), Thenzawl chu COVID-19 vangin ZMC-ah a boral ve leh a, Feb. 28-a hri kai hmuhchhuah kha niin natna dang nei tel a ni a, hemi ni vek hian ZMC-ah admit nghal niin Zirtawpni zan khan a boral zui ta a ni. Heti hian Serchhip District-a hri kai hmuhchhuah te zingah mi 32 an boral ta a, Thenzawl bikah hian hri kai mi 8 an boral tawh bawk a ni. Tun dinhmun bikah Serchhip District-ah Thenzawl hi hri kai enkawllai tam berna khua niin mi 50 enkawl mek an ni a, Serchhip-ah 46 enkawl mek an ni bawk.