Ka ta a ni lo tih ngai khawpa sum ngah nih ka tum ve lo - Lalsawta

Mizoram Pradesh Congress Committee (MPCC) President, Lalsawta chuan duhamna chu natna angin a damdawi a awm ve lo tih sawiin, “Ka ta a ni lo tih chul ngai khawpa sum ngah nih hi ka tum ve lo,” a ti.

MPCC in 'Chhim hrut fehchhuah' an hman tawpa Inrinni-a Serchhip Bazar-a Vantlang Inkhawm neih ah MPCC President Lalsawta chuan Mizoram chu indona hmuna awm mek kan nih lantirtu chu nu leh pa ten fate an sun mekna hi a ni tih sawiin, duhamna leh mahni hmasialna chu Assembly-ah hial pawh a lang tawh niin a sawi a. “Mizo mipuite hi keimahni leh keimahni kan inchhanchhuah a ngai a, eng ram mahin min chhanchhuak dawn lo. Kei chuan ‘beiseina’ hi ka tlangaupui a ni. Kan thalaite hian keini puitling tawhte, upa zawkte ai hian ram an vei zawk daih a, dikna pawh an duh zawk. Chu chu Mizoram siamtha tura beiseina ka neih chhan a ni,” a ti.

MPCC Presideny chuan, “Politics hi a tha zawnga kan her dik a ngai a. Burma ram nasa taka an buai chhante, indona avanga Ukraine buai em em chhan pawh khu Politics vek a ni. Chuvangin, politics-ah hian ka tel ve lo ti ringawt lovin, siamthat tumin theihtawp i chhuah ang u, Politics tha lo hian kan zavaiin min hrut vek tho a ni. Politics hmangin sawrkar tha hi i siam ang u. Chutiang tur chuan mitinte thawhpuiah ka sawm che u a ni,” a ti bawk.

Serchhip Block Congress Committee President Lalramnghaka Kawlni kaihhruai he hunah hian MPCC Vice President Lal Thanzara pawhin nakum maia Assembly inthlan lo awm turah Chief Minister ni thei turte uluk taka khaikhin turin mipuite a chah a. MPCC Treasurer Zodintluanga pawhin MNF sawrkarna hnuaiah chuan Mizoram Budget in loneitute hnen a thleng phak lo niin a sawi bawk.