Durtlang Workshop pakhat-a thil puak-ah mi 3 in nunna chanin pakhat in hliam a tuar

Nimin zing dar 8:45 vel khan Durtlang-a Workshop pakhat-ah eng nge tih hriatchian loh thil puak nasa tak awmin mi pathum in an thih phah bakah a bulhnai In thenkhat bungrua engemaw zat a chhe bawk a. He thil puak hi mithiam ten an chhui zui hnuah Electronic Detonator ni ngeia ngaih a ni tih Police hotuten an sawi.

Thudawn danin he vanduaina thlenna hmun hi Lalhmangaihzuala, Durtlang Mual Veng Workshop nikun nimin zing khan Lalthafamkima, Sakawrdai, tuna Thuampui Veng Aizawl-a khawsa mek chuan a Bolero Pick-up (MZ-01-S/5983) chu siam tir turin Workshop hi a pan a, siam tura an inbuatsaih laiin he vanduaina hi a thleng a. He thil puak avang hian a hmunah Workshop neitu Lalhmangaihzuala (28), Durtlang Mual Veng leh Pick-up neitu Lalthafamkima (48), Sakawrdai chu an boral nghal a. Emanuel Lalmawikima (18), Sakawrdai chu Synod Hospital Durtlang-a hruai a nih hnuah a hliam tuar lovin a boral ve leh a, Pick-up khalhtu Thangsorai, Damparengpui khua chu Synod Hospital-ah enkawl mek niin, a hliam na viau nia thudawn a ni a, a bulhnai meter 100 huamchhunga In 9, chhungkaw 14 te chenna leh lirthei te a tichhe bawk a ni.

He thil puak hi a tirah Workshop-a Carbite Cylinder puak ni-a ngaih niin a puak ri pawh a ring hle a. Hemi chungchangah hian DIG Northern Range, Lalbiakthanga Khiangte chuan, Forensic Scince Laboratory-in vanduaina thlenna hmunhma an enfiahna atangin Carbite Cylinder puak ni lovin Bomb tihpuahna hmanrua, Electronic Detonator them tam tak hmuh a nih vangin Detonator ngei ni-a ngaih a ni, a ti a. Workshop-a siam tur Pick-up chhiat dan atangin Pick-up hian Detonator chu a phur ni ngei-a ngaih a ni tih a sawi a ni.

Lalbiakthanga Khiangte chuan Electronic Detonator chu License nei lo tan duh duha neih leh ken phal a ni lo tih sawiin, tuna puak ta pawh hi a kengtuten License an neih leh neih loh chhui chian a nih tur thu a sawi a. License nei tan pawh a phurhna tur bik motor a awm a, khawih leh hman mai mai loh tur a ni a, he vanduaina hian mipui tan zirtirna pe se an duh tih sawiin, hetiang vanduaina thleng thei lakah mi tin fim-khur turin a ngen a. Vanduaina thlenna hmun hi Police ten thleng nghalin Forensic Scince Laboratory-a thawk te pawh koh nghal an nih thu leh mipui ten a hmunhma ti chingpen lova venhim a nih avangin thil thlen dan hi harsa lo taka hriat theih a nih thu a sawi bawk a ni.