Serchhip-ah Mathematics Summer Camp nei

Serchhip khawchhunga pawl 10 zirlaite tana buatsaih kar khat chhung awh tur ‘Mathematics Summer Camp’ chu nimin khan Govt. Serchhip College-ah neih tan a ni.

Mizoram Science, Technology and Innovation Council leh Govt. Serchhip College-a Dept. of Mathematics tangkawp in an buatsaih ‘Mathematics Summer Camp’ hi Govt. Serchhip College Principal PC. Lalremsiama chuan hawngin Mathematics chu Subject pawimawh a nih avangin a bulthut tal hriat a pawimawh thu a sawi a. Eng hna pawh zawng dawn ila zawhna chhan tur zingah Mathematics Subject chu a tel ngei ngei tih sawiin, Competitive Exam tum tan phei chuan a pawimawh lehzual thu a sawi bawk.

He hunah hian Govt. JM H/S Serchhip-a Headmaster Paul Zohmingthanga pawhin Mathematics Subject chu Mizote zingah a tam zawkin a har an tih leh a theih ang anga an pumpelh thin Subject ni mahse Subject dang te aia a har bikna a awmloh thu leh taihmakna nena Subject dang te anga zir chuan a harsat bikna a awmlo tih a sawi a. Serchhip-ah a vawi khatna atana hetiang hun buatsaih a ni chu lawmawm a tih thu leh kum dangah chuan a huang zauha, naupang zawng zawng tel theihna tura buatsaih tha a tih thu a sawi bawk.

Chawlhkar khat chhung awh tur ‘Mathematics Summer Camp’ ah hian Serchhip khawchhung a High School atangin naupang thlanbik ten Govt. Serchhip College-ah nitin Class an kal thin anga, ni khatah class vawi li an nei dawn a, tun tumah hian H/S 5 atangin zirlai 41 an tel a ni.