Mizoram thil pawimawh hrang hrangah Dr. R. Lalthangliana’n sawrkar laipui a dawr

Health Minister Dr R. Lalthangliana chuan nimin khan sawrkar laipui-a mi pawimawh hrang hrangte chu kawmin Mizoram thil pawimawh a sawipui a. Mizoram in a mamawhna a san em avangin NHM Second instalment cheng vbc. 40 tal a rang thei ang bera release turin a ngen nawn leh bawk.

Health Minister Dr. R. Lalthangliana hian nimin khan AYUSH, Shipping & Waterways Minister Sarbananda Sonowal chu a Pisa-ah hmuin tunhnaia Mizoram-a a lokal a Ayush Hospital leh thildang dinna tur atana lungphum a rawn phum chu tihlawhtling rang turin a ngen nawn leh a, heimi chungchang hi hun reilote chhunga chinfel thuai an inbeisei thu Union Minister hian a lo hrilh a ni. Thenawm ram Bangladesh nena insumdawn tawnna atan leh zin veivahna atana mipui nawlpuiin an hman tangkai theihna tur Darzokai-Kawlchaw (Chhimtuipui) leh Khawthlangtuipui, Bangladesh ramri dep a awm chu mihring leh bungraw phur theihna lawng chi khat – River Cruise Vessel project a siam turin Union Minister hnenah hian a thlen bawk a, Union Minister hian a changtu Chairman hnenah uluk deuh zawka lo enfiah tira hmalak dan kawng ngaihtuah tura hrilh a lo tiam bawk a ni.

Dr. R. Lalthangliana hian Health & Family Welfare Ministry tlawhin Economic Adviser (NHM) Indrani Kaushal leh Official pawimawh dangte nen an inkawm bawk a. Health Miniser hian Mizoram in kan mamawhna a san em avangin NHM Second Instalment cheng vbc. 40 tal a rang thei ang bera release turin a ngen nawn leh a, hei bakah hian PM-ABHIM account chu a rang thei ang bera rawn release vat turin a ngen bawk a, a thu thlen hi lo ngaihpawimawh sakin, a rang thei ang bera chinfel a nih tur thu an lo tiam a ni. He hunah hian Dr.Kavitha, Scientist, ICMR chu Health Minister a koh angin a tel bawk a, ICMR in Covid-19 kan hmachhawnna kawnga Mizoram tana thil tam tak an tihsakna ah Minister hian ICMR chungah lawmthu a sawi a. UNICEF-in ICMR kaltlanga RTPCR khawl pariat (8) an rawn pek tur chu tun thla thar April ni 1, 2022 hian Zoram Medical College, Aizawl thleng hman vek turin rawn thawn an tum a, an inruahman mek tih an lo hrilh a ni.

Higher & Technical Education Minister ni bawk Dr. R. Lalthangliana hian Ministry of Education Secretary (Higher Education) K. Sanjay Murthy leh Addl Secretary (Higher Education) Vineet Joshi bakah Official pawimawh tak tak te nimin vek khan inkawmhona (meeting) a neihpui a, he hunah hian Mizoram chhim lampang tana Mizoram University Southern Campus chu a rang thei ang bera kalpui turin a sawipui nawn leh a, January 27, 2020-a phalna awm tawh si beisei aia an muang deuh ni a a hriat thu sawiin, Official-te hian Mizoram University te nen tang tlanga hma an lak ho mek chu chak zawka an kalpui mek thu an lo hrilh a, theihtawp an chhuah zel tih an sawi a ni.

RUSA hnuaia Teaching Faculties (Asst. Proffesors) mi 70 te hlawh, nikum 2021 April atanga Vawiin thlenga la sanction loh chu a ngaihmawh thu Minister hian thlen nawn leh bawkin, Ministry of Finance lamin an tihfel ngai ve tur an la tihfel loh avanga tlai a nih thu Ministry of Education (Higher Education) Secretary hian a sawi a ni.

RUSA -3 rang taka kalpui tul a tih thu Minister in a thlen pawh thla khat chhung vela hei hi peihfel an inrin thu an lo hrilh a, Minister hian he RUSA-3 hi New Education Policy nena inmil turin guidelines leh a kalpui dan tur hi her rem theih hram ni sela tih a thlen bawk. Hei bakah hian National Institute Technology (NIT), Lengpui a kum engemawzat kalta a bultan nisi Vawiin thlenga harsatna kawng hrang hrang avanga hmalakna khaihlak rei lutuk chungchang chu a thlen bawk a ni.