MYC Incubation Centre tur lungphum phum

Lunglei Serkawn-a Mizoram Youth Commission Incubation Centre sakna tur lungphum chu Inrinni khan Lunglei North bialtu MLA leh MYC Chairman Dr. Vanlaltanpuia chuan a phum.

Lungphum phumna hunah hian MYC Chairman Dr. Vanlaltanpuia chuan MYC Incubation Centre-ah hian thalaite hmasawnna tura hmalakna hrang hrang – Competitive Coaching, Information Technology, Skill Development leh Entrepreneurship-te a len vek tur thu sawiin, Residential tura ruahman a nih thu a sawi a. Thalaite hmakhua ngaia an ram phal taka petu Serkawn khawtlang te chungah lawmthu sawiin, an ram pek chu Human Resource tih hmasawnna kawngah leh ram Economy than len zelna kawngah tangkai taka hman anih tur thu a sawi bawk.

MYC Chairman chuan Mizo thalaite hmasawnna turin MYC chuan theihtawp a chhuah zel dawn tih sawiin, Lunglei, Siaha leh Kolasib District-ah te MYC Coaching Centre hawn a ni tawh a,Champhai-ah pawh hawn leh thuai tum a ni tih a sawi a. Aizawl leh Serchhip-ah MYC Youth Centre sak mek a nih thu sawiin, Lunglei-ah MYC Youth Centre sa tura ruahmanna a kal mek thu leh Mizo thalaite hawizau zela, National Level chona va man phak ve tura kawng kawhhmuh zel an tum thu a sawi bawk.

He hun hi Lunglei HPC Vice Chairman Lawmawma Tochhawng MLA pawhin hmanpuiin Lunglei khawpui ah zirna In changtlung tak, Incubation Centre an nei tur chu an vannei takzet tih a sawi bawk.