Serchhip DUDO hovin STP, YMA leh Joint VC ten Auditorium chungchang an sawiho

Nimin khan Serchhip District Urban Development Officer (DUDO) hovin Serchhip Auditorium chungchang sawihona neih a ni a, Serchhip Auditorium pawh a hmunah ah tlawh nghal a ni.

Tunhnaia Serchhip Auditorium chungchanga Serchhip Thalai Pawl (STP) ten hma an lak hnuah nimin khan STP bakah Serchhip Sub-Hqrs. YMA, Field Veng Branch YMA leh Serchhip Town Jt. VC hruaitute chuan Serchhip DUDO Lalthanghliri Pautu hovin a Office-ah Auditorium chungchang hi an sawiho a, STP hruaitute hnen atanga thu kan dawn danin he hunah hian Serchhip DUDO chuan Auditorium chungchanga thil pawi lo thleng tawh chu thil thleng tawh a nih thu sawiin, tunah chuan a chhiat belh zel lova a himna tura hmalak dan tur chungchang sawiho a duh thu a sawi a, Auditorium hi renovate chi a nih leh nih loh pawh Soil Testing ti tura rawtna a awm thute a sawi a, a lei a nghet a, a him tha a nih chuan a thawmthatna tur atan pawh ruahmanna siam te pawh a theih anga, a hmunhma a him lo a nih chuan thawmthatin awmzia a awm dawn lo tih a sawi bawk a ni.

Thudawn danin he huna kalkhawmte chuan Auditorium chhunga bungraw tihchhiat bakah a chung far nasa chuan thil tam tak a tichhia tih an sawi a, a thawmthat hna chu rang taka thawh thuai an duh thu leh a thawmthat hna thawh hmaa a chhe zel tur vên hna thawh chu thil pawimawh hmasa nia an hriat thu bakah, a enkawltu tur dah theih nise an duh thu an sawi a, DUDO chuan a enkawltu tur dah dan ngaihtuah chu tha a tih thu sawiin, ruahmanna pawh an siam nghal a, Auditorium pawh a theih ang anga mipui hman theiha siam leh thuai a nih theih nan a thawmthat ngai zualpuite thawmthat dan ngaihtuah nise an ti a, hemi tur hian Sub-Hqrs. YMA kaihhruaina in hnatlang neih nise an ti bawk.

Nimin-a Auditorium chungchang inkawmhona neih a nih hnu hian he thutkhawm a tel te hian Auditorium chu a hmunah an tlawh nghal bawk a ni. Tarlan tawh angin STP te hian Pathianni khan Serchhip Auditorium hi a hmunah tlawhin a chhunga bungrua nasa taka suasam a ni chu pawi an tih thu an lo sawi tawh a. Hemi hnu hian Serchhip Joint VC te pawhin Auditorium hi a hmunah an tlawh tawh bawk nia thudawn a ni.