FC Serchhip Kawnpui ten hnehna nen bul an tan

MFA Cup khelh mekah Serchhip District aiawha khel FC Serchhip Kawnpui te chuan nimin khan an match hmasa berah hnehna an chang.

Keifang Centenary Football Ground-a MFA Cup vawi 20-na khelh mekah hian FCSK te hi Group C-ah awmin nimin khan an match hmasa berah Hnahthial District aiawh khel Electric FC chu 5-4 in an hneh hram a, FCSK hian tan atanga minute 7-na lekah hma hruai mah se Team pahnih ten goal an inkhung chhawk mawlh mawlh a, minute 80 thleng 3-3 niin Electric FC hian goal  khat khung belh mah se minute 85 hnu lamah FCSK in goal hnih khung lehin 5-4 in hnehna an chang hram a, FCSK tan Malsawmtluanga Tochhawng chuan goal hnih khungin Vanlalrin-puia, Felix Lalruatsanga leh Dennis Lalhruai-tluanga te chuan goal khat theuh an khung bawk.

FCSK hian tukin dar 9:00 hian Siaha FC chu an hmachhawn leh dawn a, an Group atang hian Team pakhat chauh tlang tur an nih avangin he inkhel ah hian hnehna an chang leh a nih chuan Semi Final an lut dawn a, hnehna an chang zo lo a nih chuan Siaha FC leh Electric FC inkhel result a zirin an dinhmun tihchian a ni ang.