Pawl 10-12 Science leh Mathematics Mizo tawng a hriatfiah awlsam turin ruahmanna siam

School Education Minister Lalchhandama Ralte chuan Academic Session tharah pawl 10 atanga pawl 12-a Science leh Mathematics-ah Mizo tawng-a hriatfiah awlsam turin ruahmanna kalpui a nih thu a sawi.

Nimin-a Aizawl Mizo Hnam Run-a thu a sawina ah Education Minister Lalchhandama Ralte chuan he thu hi sawiin SEDP bu-a an tarlan angin Mizo hnam chawilar thei turin thangtharte ah Mizo Nationalism tuh a nih theih nan hma an la nasa hle tih a sawi a, pawl 6 atanga pawl 8 zirlai-ah 'Zonun' tih zirtirna an telh tih sawiin, Science leh Mathematics-ah pawh English hlirin kan inzirtir thin chu Academic Session tharah chuan pawl 10 atanga pawl 12-ah Mizo tawng-a hriatfiah awlsam turin ruahmanna an kalpui tih a sawi a. Kan Culture, Sakhua leh hnam tawng humhalh pawh an ziah angin Session hnuhnung berah khan Mizo tawng buaipuitu tur 'Mizo Language Development Board Bill, 2022' lungrual taka an pass tawh thu leh Zohnahthlak tawng hrang hrang hmangte min phuarkhawm that tur thu sawiin, Mizo hnam tan thil hlu leh chhinchhiah tlak tak a nih tur thu a sawi a ni.

Education Department chu Covid tuartu tam ber an ni tih pawh Education Minister chuan sawiin, “Kohhran leh Private School thlengin kan thla a tliak deuh hnawp a ni. Khati chung khan online hlawhtling taka zirna kalpuiin, Youtube kaltlangin zirtirna kan pe bawk a. Hripui karah kum hnih chhung khan Mid-Day Meal pawh zirlai nuai hnih chuangah tha takin kan kalpui char char a ni,” a ti a. April ni 5 atangin Offline zirna kalpui turin an inbuatsaih mek tih sawiin, “India ram pumah Covid chhung hian kum 2020 leh 2021-ah Board Exam siam thei kan ni a, Offline-a MBSE hnuaia exam buatsaih thei kan ni kha a chhuanawm takzet a ni,” a ti bawk.

Kum 2023 Academic Session tharah chuan Primary, Middle leh High School-ah Uniform inang vek ha turin ruahmanna an siam thu pawh Education Minister chuan sawiin, “Sikul dangah insawn mahse hautak lo zawkin uniform a ngai a rin theih turin kan ti a ni. School Upgradation chungchangah hri avangin kan sum dinhmun a chhe si a, kan CM hovin sum dinhmun a ziaawm veleh upgrade turin hma kan la mek a ni,” a ti bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result