Serchhip Auditorium nasa taka suasam vangin STP ten Police-ah FIR an thehlut

Serchhip Field Veng-a sak Serchhip Auditorium chu nimin khan Serchhip Thalai Pawl (STP) te chuan a hmunah tlawhin Auditorium leh a chhunga bungraw hrang hrangte chu mi tu tih hriat lohten nasa taka an suasam avangin, hemi kawnga mawhphurtute zawng chhuak turin nimin vek khan Serchhip Police Station-ah FIR an thehlut nghal.


Cheng nuai 2126.01 senga Serchhip Field No. I hmuna Auditorium sak hi June ni 23, 2017 khan hawn niin, hawn a nih atang hian enkawltu mumal dah a ni lo tih STP chuan an sawi a, hetihlai hian DUDO leh Serchhip Field Veng YMA-te chuan phalna nei lo-te an luh theih lohna turin a Gate-pui chu Tala-in an kalh a, amaherawhchu hmun dang atangin mi tu tih hriatlohte an lo lût a, heng mite hian Auditorium-a darthlalang te tikhehin, a chhunga thutna (chair)-te an zai chhia a, a chhunga bungraw dang thenkhat tichhiain rûkbo te pawh an nei niin niin a lang a, a chhungah bawlhhlawh a tamin, ruihhlo tihna hnuhma tam tak hmuh tur a awm bawk a, Serchhip Thalai Pawl chuan hetianga Auditorium sawisak a ni hi a rilru natthlak an tih thu sawiin, a tichhetute zawng chhuak a, hremna pek an nih theihna turin nimin tlai khan Serchhip Police Station-ah FIR an thehlut ta a ni.

STP chuan Auditorium hi a sak a that tawk loh avangin a chung atanga ruahtui farin ceiling pawh nasa takin a tichhe tawh tih sawiin, a bangte pawh a khik bakah Auditorium-a hmanraw thenkhat dahte chu hmantlak mumal lohte pawh a awm niin an sawi a, Auditorium hi a tlakbal nasat tawh avangin mipui punkhawmna atana hman a nih leh theihna tur atan chuan cheng tam tak senga thuamthat a ngai dawn nia an ngaih thu an sawi a ni.

Hetianga sum tam tak senna Auditorium hman hleih theih loha a tlakbal takna chhan hi a enkawltu mumal an awm loh vang nia a lan thu Serchhip Thalai Pawl te chuan sawiin, Serchhip hmun tha lai taka cheng tam tak senga sak, Auditorium hi mipuiten tangkai zawka an chhawr zel theihna turin tuna a chhiatna hrang hrang hi sawrkarin thawm tha a, a enkawltu mumal dah nise an duh thu leh a hranpaa a enkawltu tur chhawr theih a nih loh pawhin YMA emaw, VC emaw, mimal kuta dah nise an duh thu an sawi bawk. Serchhip Field Veng Branch YMA hruaitute chuan Auditorium himna tura hma an lakna te STP hruaitute hi an lo hrilh ve bawk a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result