Kut themthiamna hi a hlu - MJA President

MJA General Hqrs. President Zonunsanga Khiangte chuan Kutthemthiamna hmanga hnathawh chu eizawnna tha tak a ni tih a sawi.

Hnam Chhantu Pawl in Hmunphiah siam zirna an buatsaih 'Short Course Training on Broom Making' kharna Zirtawpni kaltaa Hnam Chhantu Pawl hmun Lengpui-a neih a hmanpuina ah he thu hi sawiin MJA General Hqrs. President chuan, “Kutthemthiamna hmanga hnathawh chu eizawnna tha tak a ni a, kan thiamna te tuma laksak theih a nih loh avangin taima taka kan thawh zel chuan Pathian malsawmna pawh kan dawng zel thin a ni,” a ti a. Hnam Chhantu Pawl hnathawh chu fakin, “Mizoram leh Mizote tana an inpekna hi a fakawm tak zet a. Kutthemthiamna lamah ngaihtuahna nasa tak an seng a, an kutchhuak hi India ram mai nilo ramdang a thleng hial tawh a ni,” tiin kutthemthiamna chu tun ai hian sawrkarin ngaihsak lehzual se a duh tih a sawi bawk.

Tun tuma training chhuak te hi Chhiahtlang leh Keitum khuaa mi 9 an ni a, chawlhkar khat chhung Training neiin midang te zirtir chhawng tura ruahman an ni.