Mizoram Police-a mi 7 leh E&ND-a mi 4 te Governor’s Medal hlan an ni

Sawrkar hnathawk tha te chawimawina sang, Governor’s Gold leh Silver Medal chu nimin khan Mizoram Governor Hari Babu Kambhampati chuan mi 11 te hnenah a hlan a, chawimawi tlak te chawimawi chu khua leh tui tha te tihtur leh kan intihphur tawnna atana pawimawh tak a nih thu Governor chuan a sawi a ni.

Raj Bhavan Durbar Hall-a Governor’s Gold leh Silver Medal hlanna hunah hian Governor chuan Sawrkar hna chu mipui vantlang rawngbawlna a ni tih sawiin, hei vang hian sawrkar hna hian mi tam tak nitin nunah kawngro a su a; sawrkar hnathawk, mahni hnaa inpe te chuan mipui tan awlsamna kawng tam takah a siamsak thin a ni, a ti a. Mipui rawngbawlsak hna chu hna ropui tak a ni tih sawrkar hnathawk te chuan an hriat reng a ngai a; nitin a mamawhtute tan tanpuitu nih tum thin tur leh hlim hmel pu chungin taimakna leh inpekna thuk tak nen hna an thawk thin tur a ni tih a sawi a. Mizoram sawrkar hnathawk zingah an hnaa mi inpe leh an hnathawh that avanga chawimawi phu te chu kumtin Governor’s Medal pek chhunzawm zel an nih tur thu sawiin, kuminah Police leh Excise & Narcotics Department a hnathawk tha tak tak zingah mi 11 thlanchhuah an nih thu leh sawrkar department danga hnathawk tha te pawhin he chawimawina hi an dawng thei tih a sawi bawk.

Nimin-a he hun hmanna ah hian Home Minister Lalchamliana pawhin sawrkar hnathawkte chawimawina hun chu kumin Republic Day ah khan Hrileng vangin a neih theih ta lo tih sawiin, he hun pawimawh tak Raj Bhavan-ah Governor in a buatsaih chu lawmawm a tih thu a sawi a. Home Minister chuan Mizoram Police hnathawk zingah chawimawina sang tak dawng thei an awm leh ta chu lawmawm a tih thu sawiin, he lawmman dawngtute hian midangte tan chona leh phurna a siamsak ngei dawn a ni, a ti a. He hnathawk tha chawimawina hi Police leh E&ND te tan chauh a nih loh thu te, sawrkar Department hrang hranga hnathawk tha te pawhin an dawn theih thu te sawiin, Head of Administration leh Head of Department te pawh hetiang lama beng hawng tur leh an naute zinga hna thawk tha chawimawi phu te chu an hnathawh dan leh an hlawhtlinna kimchanga ziahsak a, chawimawina dawng thei tur list thehluhna ah thehluhsak turin a chah bawk a ni.

He hunah hian Excise & Narcotics Department Minister Dr. K. Beichhua pawhin Go-vernor’s Gold leh Silver Medal dawng thei zingah kumin-ah a nau te a vawikhatna atana an lang thei chu a chhuang hle tih a sawi a. E&ND a thawk te chu mi tlemte ni mahse ruihhlo tawlh leh hralh thil ah Mizoram venghim turin hna hautak zet thawktu an ni tih sawiin, he chawimawina hlu tak hian E&ND thawktu tlemte pawh a tihphur sawt a, a hma aia nasa zawka tan la tura a nawr a rin thu a sawi bawk.

Kumin-a Governor’s Gold Medals dawngtute hi C. Lalbiaktluanga, Sub-Inspector, ANS, E&ND; Lalkunga, H/C 170, ANS, E&ND; PC. Lalrinsanga, C/270, Aizawl DEF leh Lalhriat-puia, C/199, Aizawl DEF an ni a. Governor’s Silver Medals dawngtute chu R.Lalrinsanga, Sub Inspector, ANS, E&ND; PC. Laldingngheta, C/316, ANS, E&ND; F.Tlanghmingthanga, Inspector (AB), 1st IR Bn.; Hav. Rohlupuia, 2nd Bn. MAP; Lalringzuala Fanai, C/16320, 3rd Bn. MAP; PC. Siamkima, C/30, Aizawl DEF leh R. Lalro-chhara, C/16350, PTS, Thenzawl an ni a. Heng mite hian Governor hnen atangin chawi-mawina tangkapui leh chawimawina thuziak an dawng a ni.

Nimin-a Governor’s Medal semna inkhawm hi Home Department-a Commissioner & Secretary H.Lalengmawia chuan a kaihruai a, Addl. Chief Secretary JC. Ramthanga chuan thu hmahruai sawiin, Home Department-a Addl. Secretary Vanlalmawia chuan lawmthu sawina a ni nei bawk a ni.