MHIP Sub-Hqrs. Rorelna leh hruaitu thlanna nei

Mizo Hmeichhe Insuihkhawm Pawl (MHIP) Sub-Hqrs. Serchhip chuan nimin khan New Serchhip YMA Hall-ah Rorelna leh Hruatu thar thlanna an nei.

Nimin-a MHIP Sub-Hqrs. Serchhip Rorel Inkhawm hi an President Sanghmingliani chuan kaihruaiin an Secretary Lalhmunsangi leh Treasurer Lalhruaitluangi te hnen atangin report ngaihthlak a ni a, Fin. Secretary Lalngilneii chuan kumthar atana Budget Rs. 2,28,000/- chu pharhin pawm a ni bawk. Rorel Inkhawm-ah hian Hmeichhia pasal nei tur ten man eitu tur atan man ei tur dik tak te eitir thin tura Agenda lut chu pawmin General Hqrs. ah thlen bakah Sub-Hqrs. huamchhunga Branch tin ten hmalak ni bawk se an ti a. Branch MHIP hruaitute term kum khat (1) ni tawh tura rawtna chu Dan Bu khawih a nih avangin General Hqrs. ah thlen nise an ti bawk.

Chawhnu lamah Serchhip Sub-Hqrs. YMA kaihhruaina hnuaiah kum 2022-2024 chhunga an hruaitu tur thlanna neiin President-ah Lianthangi (Dinthar Branch); Vice President-ah Sanghmingliani (IOC Branch); Secretary-ah Angeli Marhmingliani (P&E Branch); Asst. Secretary-ah Lalhmunsangi (Bukpui Branch); Treasurer-ah Lalhmunthangi (New Serchhip Venglai Branch) leh Fin. Secretary-ah Zohmingthangi (New Serchhip North Branch) te thlantlin an ni.