Mizoram Liquor (Prohibition) Draft Rules, 2022 atana rawtna Council of Minister in an pawm

Chief Minister Zoramthanga hovin nimin khan CM Conference Hall-ah Council of Ministers thutkhawm neih a ni a, Department hrang hrang atanga ngaihtuah tur lut te ngaihtuahin Excise & Narcotics Department (END) atanga Mizoram Liquor (Prohibition) Draft Rules, 2022 rawtna thehluh chu pawm a ni.

Thudawn danin, Excise & Narcotics Department (END)-in MLP Draft Rules, 2022 rawtna an thehluhah hian Zzu leh a kaihhnawih hrim hrim khap bur tha tih a ni a. Tunhnaia sawi hlawh tak Wine zawrh phal leh phal loh chungchang tarlan a awm lo a, Wine zawrh phal leh phal loh chu Council of Minister thutlukna siam tura dah niin, MLP Rules hi pawm nimah se, Wine zawrh phal a nih dawn leh dawn loh sawrkar thuchhuah ah tarlan tel a ni lo a ni.

Grape chíngtute chuan rawtna awm pakhat, Alcohol 5% telh chu tha an ti lova, tha an tih loh chhan chu alcohol a tlem lutuk chuan Wine chu thla ruk (6) vel bak a tha thei dawn lo a ni. Alcohol tel tur zata an duhthusam chu 14% a ni a, 11% a nih pawhin Wine chu a tha rei tho tura ngaih a ni a, MLP Rules ngaihtuahtu Committee-ah Wine-a Alcohol tel tur zata sawi rîk tam ber chu 5%, 11% leh 14% a ni a; Cabinet-in wine siam a remti a nih chuan alcohol tel tur zatah thutlukna an siam ang.

Hei bakah hian Chief Minister hova Council of Minister thukhawm hian Rural Development Department atanga Tlabung RD Block leh Kawrtethawveng RD Block siam tura rawtna lut chu an ngaihtuah hnuah pawmin Tlabung RD Block thar siam tur hi Lungsen RD Block atangin leh Bunghmun RD Block hmun then-khat atanga sahthlak tura ruahman a ni a; Kawrtethawveng RD Block hi Zawlnuam RD Block atanga sahthlak tura ruahman a ni bawk. India sawrkarin thuchhuah a siam bawhzuia Home Department atanga lut Mizoram Private Security Agencies Rules, 2022 chu Council of Minister hian an pawm  a ni bawk.