Sawrkar hnathawkte chu mipui rawngbawlna rilru pu chunga hna thawk thin turin chah

Mizoram Chief Secretary Renu Sharma chuan zan khat riaka Khawzawl District chu tlawhin sawrkar hnathawkte chu mipui rawngbawlna (public service) rilru pu chunga hna thawk thin turin a fuih.

Khawzawl-a Sawrkar hmalakna hrang hrangte tlawha zan khat riaka zin Chief Secretary hian Inrinni khan Khawzawl DC Conference Hall-ah Khawzawl District chhunga sawrkar hnathawk hotu (Head of Office) te Meeting a neihpui a, he hunah hian Chief Secretary chuan Mizoram-ah tum thum a awm tawh tih sawiin, Department pawimawh tak tak - Finance, GAD, Home leh DP&AR ah te a awm thin avangin Mizoram leh sawrkar hnathawkte kalphung a hrechiang tih a sawi a. Khawzawl District-a sawrkar hnathawkte chu DC kaihhruaina hnuaiah thahnemngai taka an thawh tawhna ah fakin, mipui rawngbawlna rilru pu chunga hna thawk a, an an hnathawhna hmunah a tha zawnga danglamna thlentu ni thin turin a fuih a ni.

China leh Europe ram thenkhatah Covid-19 hri thar a hluar leh mek tawh avangin India sawrkar pawhin State tinte fimkhur turin a chah thar leh tawh tih Chief Secretary chuan a sawi a, Khawzawl District-a Office, Zirna In leh mipui vantlang khawsakna hmunahte Covid Appropriate Behaviour (CAB) zawm tha sauh sauh thin turin a chah nghal bawk.

Chief Secretary hova thutkhawm Khawzawl District Bawrhsap CC. Lalchhuangkima chuan powerpoint presentation hmangin District dinhmun (profile) tlangpui bakah Sawrkar Project langsar zual thenkhat - Vankal Solar Park, Tualte Tomato chin, Nizung chakna hmanga tui pump (Solar Water Pumps), PMGSY kawng laih, BPL Free Villages, Kawlkulh-a Dragon Fruit chin mek te bakah Myanmar raltlan leh African Swine Fever (ASF) dinhmunte a tarlang a. Khawzawl District-a Tourism chawilar kawnga theihna awm hrang hrangte a tarlang bawk. Hei bakah hian Khawzawl SP PC. Lalchunglura chuan Police Department hmalakna leh mamawh hrang hrangte tarlangin, Dr. Albert Lalhminghlua, District Medical Superintendent cum Chief Medical Officer in District chhunga damdawi In hrang hrang leh Covid-19 dinhmunte a tarlang bawk a ni.

Khawzawl District Headquarters chhunga Sawrkar hmalakna hrang hrangte pawh Chief Secretary hian a tlawh a. Darngawn Veng-a Mualvawm Field leh Pavilion sak mek te, Dinthar Veng-a DC Office Complex leh DRDA Office tur sak mek te, Hermon Veng-a District Hospital leh CMO Office building sak mek leh Peng pui, Darngawn-a Solid Waste Management Centre sak mek te a tlawh a. Heng bakah hian Dinthar Veng-a SP Office leh KVK, Kawnzar-a Cold Storage bunte pawh a tlawh a, DC leh SP bakah Officer ten an tawiawm bawk a ni.