Mizoram-ah Heroin No. 4 hluar zelin thingtlang lamah pawh ti thar an tam zel niin a lang

Excise & Narcotics Department thawktute chuan tunlai hian Mizoram hmun hrang hrangah Heroin (No. 4) a hluar hle tih sawiin, Heroin man pawh ni dang ai chuan a tlawmin a man hi a tlahniam hle nia thudawn niin hmun hrang hrangah Heroin man pawh a awm deuh reng bawk a ni.

Excise & Narcotics Department thawktute chuan Mizoram hmun hrang hrangah Heroin hi hmuh tur a awm thu sawiin, State pawn atangin a lo lut nasa a, Heroin man ni danga to tak ni thin kha tunlai hian a tlawm hle niin an sawi a, “Heroin hi Myanmar ramri maiah hian an stock niin kan hria a, Tiau lui kaina khan hi a tam avangin kan tan chet a harsa a. Damdawi hi man nei nual mah ila man loha put hi a tam hle in kan hria a ni,” an ti. Inkalpawhna leh inbiakpawhna a that tawh avangin Heroin chu inpek zung zung a awlsam tih sawiin, “Damdawi order nan hian Mobile Phone te an hmang tangkai hle a, chumai bakah Two Wheeler hmangin an inpe zung zung a. A zuartu leh a lei duh te awlsam taka an inpek theih avang hian thingtlang lamah pawh Heroin ti thar hi thalai te zingah an tam hle niin kan hria,” an ti bawk.

Heroin chu Mizoram-ah a luh nasat avangin a man pawh ni dang ai chuan a tlawm niin Excise & Narcotics Department chuan an sawi bawk a, “Lockdown laia heroin hawng khat Rs. 50,000 vel ni thin kha tunlai hian hawng khat Rs. 28,000 te a ni a. Myanmar buai vanga raltlan vangin ruihhlo zuar te hian Mizoram-a lakluh nan an hmang tangkai niin kan hria a ni,” an ti bawk.

Mizoram-a thalai te ruih ber chu Heroin a ni tih, Alprozolam leh Diazepam chu Heroin an hmuh lohin an tih kawp niin an sawi a. Khawthlang ram ten an buaipui Methamphetamine chu Mizo thalaite zingah ti an awm an la hriat loh thu sawiin, tuna an man thin pawh Bangladesh kaltlanga Middle East leh khawthlang lam rama thawn tur nia an hriat thu an sawi a ni.

Excise & Narcotics Department chuan January leh February, 2022 chhung khan Heroin kg. 2.293 zet an man a, Methamphetamine kg. 13 man bawkin thla 2 chhunga dan bawhchhia an man zat chu mi 628 an tling bawk a ni.