Serchhip-a One Stop Centre Building thar District Bawrhsap in a hawng

Ministry of Women & Child Development bultuma Serchhip P&E Veng-a sak, Hmeichhe baihvaite tlukluh lailawkna In, Sakhi - One Stop Centre building chu nimihn khan Serchhip District Bawrhsap Nazuk Kumar chuan a hawng a, he Centre hi Serchhip-a hawn a nih atangin pantu mi 56 zet an awm tawh a ni.

Serchhip P&E Veng huamchhung, Judicial Veng-a One Stop Centre Building sak thar hawnna hunah hian Bawrhsap Nazuk Kumar IAS chuan Serchhip in One Stop Centre Building thar tha tak mai a nei chu lawmawm a tih thu sawiin, hmeichhia harsatna neite tan a hluin a tangkai hle dawn a ni, a ti a. Hmeichhiaten vantlangah te, mahni inchhungah ngei pawh hleihlenna an tawk palh thei tih Bawrhsap chuan sawiin, chhantu nei lovin chung harsatna leh hrehawmna te chuan min delh bet tlat thei tih a sawi a. Chutiang ang harsatna tawkten he Centre hi pan nachang hriain, anmahni tanpui tur leh a tul anga dan anga anmahni humhim turin an inpeih reng tih hre reng turin mipuite chu a chah a. Anmahni ngei an tlanlut thei lo anih pawhin Phone hmanga biakpawh mai tur a nih thu leh rilru lama harsatna an tawhte thlengin enkawl theih an ni tih a sawi a, hetiang Centre hlu leh tha kan nei hi mitinin kan hriat a tul thu sawiin, Centre thawktute, Media mite leh khawtlang hruaitute chu hmeichhia harsatna tawkte tan hetiang Centre tha tak a awm thu zau zawka sawi zel turin a chah bawk.

One Stop Centre-a Nodal Officer leh Serchhip DC Office-a Superintendent R. Lalmuankimi kaihhruai he hunah hian Khual zahawm leh Women & Child Development-a Director Lalllianpuii pawhin Serchhip-a One Stop Centre Building hawn a ni ta chu lawmawm an tih thu sawiin, Centre tha tak a awm theih nana thawktute zawng zawng chungah lawmthu a sawi bakah ram tha tak sahthlak saktu Land Resources, Soil & Water Conservation Department chungah an lawm hle tih a sawi a. Tunhma lama Social Welfare Department awm thin chu kum 2018 atangin Directorate pahnih ah thenin, Directorate of Women & Child Development chu April 1, 2020 atangin Office hran neia an awm thu leh, nu leh naupang bik tan liau liau a hma la tu an nih thu sawiin, an Department hmalakna hrang hrang te pawh a sawilang bawk a ni.

Serchhip-a One Stop Centre hi September 11, 2019 khan hawn a lo ni tawh a, a tirah DC Office-a Room pakhat chu Office atana luahin sawrkar laipui in an building sakna tur hmun ngaihtuah tura a rawn tih angin Serchhip P&E Veng-a Land Resources, Soil & Water Conservation Department ram chu satthla in building hi sak a ni a. David Zodingliana, AE, DRDA in Technical Report pe-a a tarlan danin OSC building hi RCC-a sak niin April 2019-ah sak tan a ni a, April 2021-ah sak zawh a ni. Mizopa chhiara chhawng hnih niin a building hi Rs. 38,68,200/- senga sak a ni a, bungraw pawimawh thenkhat leina leh Retaining Wall siamna nen a vaiin Rs. 46,45,230/- sen a ni.

Serchhip-a One Stop Centre-ah hian thawktu Centre Administrator hovin Case Worker, Counselor, Paramedical Staff leh Data Analyst pakhat theuh leh Multipurpose Worker leh Security mi pahnih ve ve, an vaiin mi 9 bakah a tul anga Dan lam kaihhnawiha rawn tur Advocate mi pakhat an awm a, he Centre hawn a nih atangin Case 56 nei tawhin a tam ber chu Inchhungkhur-a hlei-lenna tuartu an ni a, an case neih zinga mi 31 te chu he Centre-ah riahtir an ni a, heng anmahni pantute hi an mamawh ei leh in bakah silh leh fen te ngaihtuah sak niin Medical Check-up te neih an nih bakah Councelling te neih thin a ni a, an harsatna neih ang te sutkian a nih theih nan kawng hrang hrangah hmalakpui thin niin Serchhip District chhung khaw hrang hrangah tum 18 zet an hmalakna te inhrilhhriatna atan Awareness Campaign neih a ni tawh bawk.