CT Scan khawl chungchang ah mipui hriatthiamna ngen

Mizoram sawrkar-a Health Department chuan Civil Hospital, Aizawl-a CT Scan khawl hman theihloh chungchangah mipuite hriat-thiamna a ngen.

Health Department thuchhuah chuan Civil Hospital, Aizawl-a CT Scan (16 slices) khawl hi kum 2013-ah NEC atanga sum hmuh hmangin bun a nih thu leh kum 8 zet rim taka hman a nih avangin repair a ngai fo tih tarlangin, hei vang hian a thlâkna tur khawl thar leh tha zâwk lei turin Sawrkar-in hmanhmawh taka hma a lak thu leh Rs. 2,60,00,000/- man CT Scan (64 slices) khawl chu kum hmasa lamah NESIDS sum hmangin lei a ni tih an tarlang a. 

A khawl hlui hi June 21, 2021 khan Siaha Hospital-a dah tura rêl niin, siam ngai laite pawh sawn fel hnua siam tura tih ni mah se sawn ruala thawmthatna tur senso tura chhût Rs. 81,73,260/- leh a khawl hlui tawh tak enkawl zuina (Annual Maintenance Contract) senso tura chhût cheng nuai 21.0 per year (+5% per annum) te ngaihtuahin kawl zui hi a manhla tawh lova hriat a nih avangin Rs. 39,76,000/- (inclusive of GST) in hralh a nih thu leh a leitute pawhin an lak fel tawh thu an tarlang a ni.

Sawrkar thuchhuah chuan tunah hian CT Scan khawl thar (64 slices) bun nan Atomic Energy Regulatory Board (AERB) thupêkte zâwm turin a khawl hlui dahna hmunhma hi chei that mêk a ni tih tarlangin, mipui mamawh hre rengin sawrkar chuan rang taka peihfel tumin theihtâwp a chhuah reng chungin, thil kalphung fel taka zawm zel a tul avangin a zawhfel nghal mai theih loh a ni chu pawi an ti hle tih an tar-lang a, mipuite hriatthiamna pawh a ngên tak meuh tih an tarlang a ni.