Chhiatna thleng hrang hrang chhuina thlirhona nei

Nimin khan DM&R changtu Minister Lalchamliana hovin tunhnai kum tlem kalta chhunga Mizoram a chhiatna hrang hrang thleng chhuina – Magisterial Inquiry leh SIT Report hrang hranga hmalak zuina te thlirho a ni.

Secretariat Conference-a he thutkhawm neih ah hian July 2, 2019 a BSUP Complex, Durtlang-a leimin chungchanga Magisterial Inquiry Report te; June 11, 2021-a Thuampui Veng, Aizawl-a In chima chhiatna thleng chungchanga Magisterial Inquiry Report te; December 17, 2021 a Deputy Commisioner, Aizawl Office kang chungchanga Magisterial Inquiry Report leh nikum April thla a Mizoram hmun hrang hranga kangmei rapthlak tak tak chhuak chungchanga Special Investigation Team (SIT) Report te sawiho a ni a. Heng Chhiatna thleng hrang hrang buaipuitu Department te leh District tina Deputy Commissioner te hmalak mek dan te chu sawiho a nih hnuin Home Minister ni bawk Lalchamliana chuan hmalak tawhna hrang hrangah lawmthu sawiin, hmalakna tur hrang hrang hmabak ah te chak taka hma la theuh turin Department te a chah a ni.

He hunah hian kum 2021 April thlaa Mizoram hmun hrang hranga kangmei chhuak chhuina SIT Report chungchangah, kangmei chhuak thei, ram leh in lama kangmei venna kawngah Sawrkar Department hrang hrang leh mipui kan tanho a pawimawh thu sawilan a ni a. SIT Report in a Department te ti tura a tih anga chak taka hmalak theuh a pawimawh thu tarlan a bawk a. Mizoram-ah khua a lo Thal tan chho leh mek a, kangmei chhuak avanga In leh lo, nunna leh thing leh ramsate chunga chhiatna thleng thei venna kawngah tan la theuh turin Minister chuan mitin te a chah bawk a ni.