NIT Mizoram Director thar in Governor a kawm

National Institute of Technology (NIT) Mizoram-a Director thar Prof. S. Sundar chuan nimin khan Mizoram Governor Hari Babu Kambhampati chu hmuin inkawmna an nei.

Raj Bhavan-a an inkawmna ah hian Governor Hari Babu Kambhampati chuan NIT Mizoram dinhmun leh hmachhawp hrang hrang te Director thar hi a zawt a. NIT Mizoram Campus chhungah zirna In leh hmunhma sak hna tan a nih thuai theihna turin NIT hotute chu tan la tur leh a theihna zawnah chuan lo tan ve a tum thu te pawh a sawi a ni. Tun dinhmunah NIT Mizoram-ah zirtirtu thawklai chu sanctioned post awm zat atanga chhutin a zatve, zaa 50 vel chauh a la ni chu tanlak a ngaih thu Governor chuan a sawi a. Zirtirtu lakluh belh kawngah Director thar chu tang turin a fuih bawk a ni.

Governor chuan Mizoram in India rama Technology Institute tha ber zinga mi NIT kan nei chu kan vannei hle a ni tih sawiin, he zirna hmuna Mizoram chhunga cheng te tan bika Seat hauh sak chu All India Entrance Exam kaltlang hnawhkhah tur a nih avangin kan zirlaite pawhin hei hi an hriat a, an tan viau a ngai tih a sawi a. He zirna In tha tak atang hian Mizo thalai Engineer tha tak leh Entrepreneur tam tak an rawn in zirchhuak ngei dawn a ni, a ti bawk.

NIT Mizoram NIT Director thar Prof. S. Sundar chuan NIT Mizoram chu India hmarchhak-a Technology Institute tha ber pawl ni tur leh India ram hmuntin atanga zirlaite pan chak ni turin a theihtawp chhuah a tum tih a sawi a. A lo thawh tawhna thin, IIT Madras nena thawhhona thuthlung pawh ziahfel thuai an inbeisei thu a sawi a, Zirlai tam zawk an neih theih nan zirtirna lakluh belh turin hma lak tum a nih thu a sawi a. NIT Mizoram Campus chhungah building sak a nih thuai theih nan sawrkar puihna an mamawh tih sawiin, tunah hian Environmental Clearance la nghah mek a nih thu a sawi bawk.

Prof S. Sundar hi mithiam tak niin March 2, 2022 khan Director, NIT Mizoram atan ruat a ni a; hemi hma hian Department of Mathematics, Indian Institute of Technology (IIT) Madras ah Head Of Department mawhphurhna a chelh a. Nimin-a Governor a kawmna ah hian NIT-a Registrar, Dr Lalchhandami Sailo chuan a tawiawm a ni.

NIT Mizoram hi kum 2010 khan din niin NIT te hi India rama Engineering leh Technology lam zirna (institute) zinga tha ber pawl a ngaih a ni a. Tunah hian NIT Mizoram hian B. Tech, M. Tech leh PhD Degree zirna kalpui mek a ni a, Zirtirtu 75 awm turah 38 an awm mek a, Zirlai 190 bawr vel Session khat chhungin an awm thin a. Hetah hian Admission ti tur chuan All India Entrance Exam- Joint Entrance Exam (JEE Main) paltlang a ngai a ni.