Lunglei-a Hnam Run-ah MNF President tin thu a sawi

Mizoram chhimlam a zin MNF President Zoramthanga chuan nimin chhun khan Mizo Hnam Run, Lunglei-ah thu sawiin, Abu Majumdar leh Kamrula te pahnih in an sawrkar ah a hmawr te pawh an khawih phak lo tih a sawi.

MNF party mipuite hmaah thu a sawina ah Chief Minister ni bawk Zoramthanga chuan, MNF thlipui tleh mek karah eptu lam hian sawichhiatna tur an hriat loh thu a sawi a, “Sawisel hram min duh avangin keini pawhin kan hriat mang loh, Congress sawrkar hun atanga an Contractor leh Supplier Abu Majumdar leh Kamrula tih vel mai mai hmangin min bei a. Hemi te pahnih hian kan sawrkarah a hmawr te pawh an khawih phak lo a ni. He'ng vel mai mai bak min sawina tur hi an hre lo,” a ti.

Sawrkar Flagship Programme SEDP chungchangah 'SEDP an sem thei lo ang' an ti tih sawiin MNF President chuan, “Kan sem dawn si a, kan sem tak tak ang tih an hlau leh a. 'Cheng nuai thum an intiam a, cheng nuai thum-in sem an tum lo' min ti leh a, a nuihzathlak ngawt mai,” a ti a. Tunah hian a thawh khatna'n cheng sing nga in an pek tur thu te, a thawh hnihna leh thawh thumna awm zel tur thu leh a tul chuan cheng nuai thum aia tam pawh an pek tur thu a sawi a. SEPD hi vawi khatah cheng nuai thuma sem tur tia an sawi loh thu a sawi bawk.