Junior Cricket Tournament khel dawn

Serchhip District Cricket Association in an buatsaih Junior Cricket Tournament chu Vawiin hian DC Playground, Khawtetlang-ah khelh a ni dawn a, Vawiin hian zawhfel hman tum a ni ang.

SDCA in kum bithliah neia Tournament a buatsaih hmasak ber Junior Cricket Tournament-ah hian Team 5 tel turin an inziaklut a, an zinga pali te hi Serchhip khawchhung atanga tel tur niin Serchhip khaw pawn atangin Lungpho chu rawn tel tura beisei an ni a, Serchhip atanga tel turte hi AO3C, Serchhip Cricket Club (SCC), Hmar Veng CC leh Tuikhuah CC te an ni.

He Tournament hi Vawiin hian khelh zawh hman beisei a ni a, match hmasa ber hi zing dar 8:30-ah khelin AO3C leh SCC an inkhel anga, hemi hnu hian HVCC leh TKCC inhmachhawn lehin heta chak pahnih atang hian a vannei zawkin Final an lut anga, a vanduai zawkin Semi Final-ah Lungpho an hmachhawn leh dawn a ni.

Tun tuma Tournament hi naupang lam chherna atana hman tum niin Team khat-ah player 16 zel awm theihin match khat-a kheltur player 11 te zingah kum 12 hnuailam mi 2 tal leh kum 14 hnuailam mi 3 tal an awm a ngai dawn a, SDCA in Academy an buatsaiha kal an nih loh chuan player khel te hi kum 16 aia tam an ni tur a ni lo bawk.

He Tournament-a Champion Team te hian lawmman ah Rs. 8000/- leh Trophy an dawng anga, pahnihna in Rs. 5000/- leh Trophy bakah a tel zawng zawngin Rs. 2000/- zel an dawng thei dawn bawk a, hei bakah hian ‘Man of the Tournament’ thlangin pawisafai leh Trophy bakah Bat an dawng thei dawn bawk a ni.