Mizoram-ah Mobile connection nei 12,61,279 awm

Mizoram-ah Mobile Phone connection nei mi 12,61,279 an awm mek a, Service Provider hrang hrang zingah Airtel chu subscriber ngah ber an ni.

Tunhnai a tlangzarh Economic Survey of Mizoram 2021-2022 a tarlan a nih danin, Aizawl District-ah Mobile Phone Connection nei mi 5,87,542 awmin District hrang hrang zinga Connection nei tamna ber a ni a, Mamit District-ah 56,116, Kolasib District-ah 90,262, Champhai District-ah 1,02,007, Serchhip District-ah 97,717, Lunglei District-ah 1,61,161, Lawngtlai District-ah 100,700 leh Siaha District-ah 65,774 an awm a ni.

Service privider hrang hrang zingah Airtel in subscriber 5,43,446 neiin an ngah ber a, BSNL in 2,37,133, Vodafone & IDEA in 1,44,882, leh JIO in 3,35,818 an nei a. Mobile Phone hmangtu zingah Phone pakhat atanga Sim Card hmangkawp an tam avangin a tak takah chuan Mobile Connection nei hi mi nuai 12 an tlin a rinawm loh thung.

Economic survey- Mizoram a tarlan a nih danin, tun dinhmun ah Mobile Connectivity in a la tuam that loh Mizoram khua 252 a la awm a, hetihlai hian chung zinga khua 246 te chu changtlung zawka Mobile Connectivity thuamthat turin ruahmanna kalpui mek a ni.