Pangbalkawn-ah Modern Rice Mill hawn a ni

Kolasib District chhung Pangbalkawn khuaa OM OM Modern Rice Mill chu nimin khan Agriculture Minister C. Lalrinsanga chuan a hawng.

OM OM Modern Rice Mill hawnna hunah hian Minister chuan OM OM Modern Rice Mill neitute chu ram hmangaihna leh intodelh duhna thuk tak avang chauha tihlawhtling thei an nih thu sawiin, an inpekna chu fakawm a tih thu a sawi a. Ram hmasawnna tur chuan mahni hma zawn a mawhphurhna theuhte rinawm tak a tihpuitlin zel tum a tul thu a sawi a. Kolasib District chhunga leilet leh huan awmte chu rampawn mi ni lovin a ram neitu dik tak ten tangkai taka an hman a, a hlawkna pawh a ram neitute ngeiin an tel theih nan Agriculture Department chuan hma a lak zel thu a sawi a, hemi tihlawhtling tur chuan huaisen tak a ke pen a tul thu a tarlang bawk a ni.

Hnianghnar taka thlai tharchhuah a nih theih nan Irrigation & Water Resources Department kaltlangin hmun engemaw zatah Solar Water Pump bun tum a nih thu Agriculture Minister chuan a sawi a, hei hian thlai kan intodelhna kawngah nasa takin thlai chingtute a puih a rin thu a sawi bawk a ni.

He hunah hian khual zahawm leh bialtu MLA K. Lalrinliana chuan buh chinna hmun tha kan neih ang angte chu tangkai taka hman a tul thu sawiin, loneitute hlawk zawk nan Sangha khawi nen a kalpui dan enchhin mek a nih thu a sawi a. Om Om Modern Rice Mill hlawhtlinna chu loneitute leh kuthnathawktute kut-ah thui tak a innghah thu sawiin, kan ram intodelhna hmanraw pawimawh tak a nih ngei theihna turin tangkai tak a hmang turin kalkhawmte a chah a ni.

Technical report-a tarlan danin kum 2016-17 khan Mizoram Sawrkar hnuaiah NEDP kaltlangin Modern Rice Mill bunna tur hian cheng nuai 80 pekchhuah a ni a, Transformer bun nan cheng nuai 33.61 SEDP hnuaiah pek a ni bawk a. Heng bakah hian Mizoram Rural Bank hnuaiah loan cheng nuai 445 hman a ni a, a neitute hian anmahni sum cheng nuai 132 an seng tawh bawk a ni. Om Om Modern Rice Mill hi darkar khat-a bun Ton 5 her thei tura ruahman a ni.