Chhawnzinga Lui Water Supply Scheme hawng

Atal Mission for Rejuvenation and Urban Transformation (AMRUT) 2017-2019 kaltlanga cheng nuai 230.73 senga Aizawl Chanmari West-a siam ‘Chhawnzinga Lui Water Supply Scheme’ chu nimin khan PHE Department leh UD&PA changtu Deputy Chief Minister Tawnluia chuan a hawng.

Chhawnzinga Lui Water Supply Scheme hi Hunthar, Edenthar bakah Chanmari West hmun thenkhata cheng mihring 4200 vel chawm tura ruahman a ni a, Chhawnzinga Lui (spring source) tuihna put 4 lakkhawm hmanga chawm tur an ni. Chanmari West mawngah Chhawnzinga Lui Pump House sak a ni a, he Pump House atang hian Edenthar Reservoir awm sa tui litre nuai 2 dawng leh AMRUT (2017-19) hnuaia sak Hunthar Reservoir tui litre nuai 1.3 dawngah pump luh a ni a. Edenthar Reservoir atang hian pipe GI (M) 80 mm hmangin Edenthar Veng-a mi 2100 leh Chanmari West-a mi 200 chawm turin pek chhuah a ni a, Hunthar Reservoir atang hian Hunthar Venga mi 1750 leh Chanmari West-a mi 150 chawm turin pek chhuah a ni a. Pump House atang hian darker tin tui litre 45,000 pump theih beisei a ni. UD&PA Department chu Nodal Agency niin PHED chu Implementing Agency a ni.