Tualte khaw tuilakna tur Dy. CM in a hawng

NABARD (RIDF-XXV) sum cheng nuai 315.46 senga nizung chakna hmanga Tualte khaw tana tuilakna siam, Tualte Water Supply Scheme chu nimin khan PHE Department changtu Deputy Chief Minister Tawnluia chuan a hawng.

Tualte Water Supply Scheme (Solar pumping) hi June ni 23, 2020 khan bultan niin, May ni 31, 2023 a zawh hman tura tih chu June ni 15, 2021-ah zawhfel a ni a. Tui connection 196 pek chhuah niin, PHED/P&V Eastern Engineers chu Implementing Agency an ni. He Project hmang hian mi pakhatin nikhatah tui litre 55 zel hmang anga chhutin mi 1483 te chu kum 30 lo la awm leh tur thleng chawmzo tura duan a ni a. Tui pump chhuahna atanga tuidahkhawlna Tuizem lian khaw lu a awm insanhleihna hi metre 496 a ni a, Pumping Station 2 dah a ni bawk. Nikhatah darkar 7 chhung tui pump thei tur leh nitin tui litre 61,600 pump thei tura duan a ni a, Tui pump-na atan hian Solar Power Plant 61.9 KW bun a ni a,  hemi atan hian Solar Plate 185 dah a ni bawk.