Serchhip-ah National Vaccination Day hmangin hri danna pe tha chawimawi an ni

Nimin khan India rampum-ah 'National Vaccination Day' hman niin Serchhip-ah pawh he ni denchhen hian kumin a Zeng hri umbo beihpui thlakna a thawk tha te hnenah chawimawina thuziak hlan an ni.

'National Vaccination Day' puala Serchhip CMO Office Chamber-a hun hman ah Serchhip CMO Dr. Lalzawmi chuan he ni an hman chhan te sawiin, India rampum huapa he ni hi hmanna neih a nih thu leh he hun hi ramchhung hmun hrang hrang atangin biakhmuh theihna hmanga lo zawm a ni tih a sawi a. Sawrkar laipui in an beisei angin Serchhip-ah pawh chawhnu lamah he ni pual hian hun hman chhunzawm a ni tih sawiin, Zeng hri umbo beihpui thlakna atana kumin March 1-a Zeng hri danna pekna a thawk tha PHC leh CHC tina Health Worker leh anmahni puitu ASHA leh Anganwadi Workers zinga thawk tha te hnenah chawimawina thuziak hi hlan a nih thu a sawi a, nimin khan Serchhip Main Centre hnuaia Health Worker thawk tha ber hnenah CMO hian chawimawina thuziak hi hlanin PHC dang zawng a chawimawina sem tur hi nimin vek khan thawnchhuakin an MO ten an lo hlan ve leh dawn a ni.

Serchhip CMO chuan India ram chu March 2014 khan Zeng hri awmlohna hmun ah puan a lo ni tawh tih pawh sawiin, amaherawh chu a thenawm ram thenkhat ah Zeng hri hi ala awm avangin Routine Immunization an kalpui mek angin kumtin Zeng hri danna hi pek chhunzawm zel a nih thu a sawi a. Tunhma lama khawvel-a Zeng hri tamna ber pawl ni thin India ram chu hetianga Zeng hri awmlohna a puan a ni chu a lawmawm thu leh Zeng hri laka kan him zui zel theihna turin hri danna pek hunbi siam ah pek chhunzawm zel a pawimawh thu a sawi bawk.

COVID-19 Vaccine pek hna pawh ngawrh taka kalpui chhunzawm zel a ni tih Dr. Lalzawmi chuan sawiin, kum 12-14 te hnenah hian 'CORBEVAX' pek a ni dawn tih a sawi a, nimin khan ramchhung hmun hrang hrangah a tlangzarhna hun hmanga pekchhuah tan a nih thu sawiin, Mizoram-ah pawh a tlangzarhna hun hi hmangin District hrang hrangah chuan karleh Thawhtanni, March 21 khian pekchhuah tan a nih dawn thu a sawi bawk a ni.

Hri danna pek kawnga thawk tha  nimin-achawimawi te hi Health Worker atangin Loicy ZT. Nghaki (Chhingchhip), CVL. Rinhlua (Ngentiang), Lilypari (Thenzawl), Lalthangduli (Leng), Lalmuankimi (Khawlailung), J. Rodingliana (Chhiahtlang) leh F. Lalrintlingi (North Vanlaiphai) te an ni a. ASHS leh Anganwari Workers atangin Lalhlimpuii (Hualtu), Lalhmunsiami (Chhingchhip Venglai), Zaihlunmawii (Lungpho), Lalhriattluangi (Ngentiang), Lalthakimi (Thenzawl), Lalhmingthangi (Thenzawl), Lalchhandami (East Lungdar), Lalrempuii (Mualcheng), Zothansangi (Chekawn), Zaihmingthangi (Khawlailung Bunghmun), Ngurchamliani (North Van-laiphai) leh Lalramliani (Bawktlang) te an ni.