MYC Office-cum-Coaching Centre building thar Chief Minister in a hawng

Mizoram Youth Commission (MYC) Office-cum-Coaching Centre chu nimin khan Chief Minister Zoramthanga chuan MINECO-ah a hawng.

MYC Office-cum-Coaching Centre hawnna hunah hian Chief Minister chuan thalaite hmakhua tana tan lak theihna tura Mizoram Youth Commission din a nih thu sawiin, Office Building tha tak hawn a ni thei chu lawmawm a tih thu leh tangkai taka hman a niha thalai te tan hmasawn hna thawh zelna tura lungphum pawimawh tak lo ni se a duh thu a sawi bawk. Chief Minister chuan thalaite chu an thatlai hmang tangkai in, talent an neihte a hunlaia hman nachang hre tura a duhsak thu a sawi a. Tunhma lamah chuan zirlai lehkhabu chhiar duh te pawh hmu zawhloh changte a awm thin thu sawiin, tunlai information khawvela technology hmasawnna zarah awlsam taka thil hriat duh hrang hrangte Mobile Phone leh Computer kaltlanga zawn hmuh zung zung theihna khawvela kan cheng hi thalaite vanneihna a nih thu a sawi bawk.

He hunah hian LESDE leh School Education changtu Minister Lalchhandama Ralte chuan MYC din chhoh a nih dan sawiin, thalaite hmakhua ngaihven lama thahnemngaihna avanga zirlai pawl hrang hrang ten sawrkara an thlen dan te, Political Party hrang hrangte pawhin tha an tihpui dan te a sawi a, kum 2006 atanga Youth Commission siam tura Drafting Committee sawrkarin a siam tak thu te a sawi bawk. MYC Chairman Dr. Vanlaltanpuia MLA pawhin an building hawn thar tak chu thalaite hmun, thalaite ta a ni tih sawiin, tlangnel taka he hmun hi hmang tangkai turin a sawm a. Budget Session neih zawh takah All India Service-a thalai tam zawk an luh theihna tura thalaite buatsaihna tura Office inrelbawlna tur pangngai bakah cheng vbc 2.66 dah a ni chu lawmawm a tih thu a sawi bawk.

Nimin-a hawn tak MYC Office-cum-Coaching Centre hi Project cost hi cheng vbc. 3 niin Lushai Engineers, Ramhlun, Aizawl chu Contrating Agency an ni a. October 2020 khan a sak hna hi thawh tan niin, September 2021 khan zawhfel a ni. A building hi chhawng li (4) niin, Chairman, Secretary leh thawktu dangte thutna tur bakah Coaching Room pathum, Computer Room te, Conference Hall, Cafeteria leh Chowkidar Quarters te a awm a ni.