Consumer Rights Day hmang

Nimin-a ‘World Consumer Rights Day, 2022’ chu Serchhip-ah pawh District Bawrhsap Nazuk Kumar IAS hova hmangin Consumer dikna chanvo chungchang inhrilhhriatna atan hman a ni.

Serchhip DC Conference Hall-a he ni puala inkhawm hi Addl. DC Lalmuansanga Ralte chuan kaihruaiin he hun hmanpuitu District Bawrhsap Nazuk Kumar chuan mitinte hi engemaw kawng tal-a leitu (Consumer) kan nih vek avangin thil leitute dikna chanvo hriatna leh dan kenkawhna tha hi kan mamawh vek tih a sawi a. Kum 1962 vel atangin khawvel in mumal takin consumer te dikna chanvo duan leh kenkawh kawngah hma a la tan a, India pawhin consumer te dikna chanvo humhimna dan tha tak tak leh a kengkawhtute, consumer lungawilo te tlanluhna tur rorelna peng hrang hrangte pawh kan nei a, a tul ang zelin i hmang tangkai thin ang u, a ti.

Bawrhsap chuan kumin-a he ni-ah hian ‘Fair Digital Finance’ tih chu thupui a nih thu sawiin, tunlai khawvelah mihringten internet kaltlanga sum leh pai inhlanna kan hman nasat tawh avang leh a hmangtute pawh kan pun chhoh zel avangin him taka heng sum leh pai inhlanna te kan kalpui theih nan kan tihtur te, kan invenna turte kan hriat a pawimawh thu leh, a awlsamna avanga tangkai taka kan hman theih lai hian tihsual palh vanga chan thei kan ni ve bawk a ni tih hriaa fim-khur taka kan hman a tul thu a sawi bawk.

Serchhip-a World Consumer Rights Day-ah hian C. Lalzemawii, Asst. Manager, SBI Serchhip Branch chuan Fair Digital Payment chungchang sawifiahin Serchhip Police Station-a OC, C. Lalremthanga chuan Ponzi Scheme (Chiahpuam) chungchang a sawi bakah Serchhip District Consumers Association President H. Zonuntluanga chuan Consumer te dikna chanvo a sawifiah a. He ni pual hian District Consumer Protection Council chuan DIPRO nena tang-kawpin Consumer te hriattur pawimawh sawifiahna video tawi an siam bawk a ni.