Latest News

MNF sawrkar chhungin leiba a pung nasa - MPCC

Mizoram Pradesh Congress Committee (MPCC) chuan MNF kum li awrh an sawrkar chhung hian leiba a pung nasa em em nia sawiin, kawngpui siam chungchangah kum 2018-a MNF sawrkar thar kha Congress sawrkar khan cheng nuai 8900 lai a hnutchhiah tih an sawi.

Nimin a thuchhuah an siamah MPCC Media Department chuan tun thla ni 21 a MNF Hnam Run chhung inkhawmah Robert Romawia Royte-in Mizoram leiba chungchang a sawi chu a tawngvai nge, Budget bu a bih miah lo tih an zawt a. “Kum 2008-2018 chhung Congress sawrkarah khan Mizoram leiba hi a pun chang leh a tlakhniam chang a awm a, Gross State Domestic Product (GSDP) nen a khaikhin phei chuan MNF sawrkar hmasa an tlak kum 2008-a Mizoram leiba chu GSDP atanga chhutin 103.5% lai a ni a, chu chu kum 2018-ah meuh chuan Congress sawrkar khan 38.9% ah a ti tlahniam hial a ni,” an ti a. MNF kum li awrh an sawrkar chhung hian leiba a pun nasat thu leh vbc. 5,238 laiin a pung hman tih Minister Robert Romawia Royte hian lo hria se an duh thu an tarlang a, MPCC chuan “MNF sawrkar hian nasa takin Mizoram leiba a ti pung a ni’ tih ‘thudik’ hi a sawi ngam lo a nih pawhin ngawi mai mai turin Congress party chuan Pu Robert Romawia Royte a chah a ni,” an ti bawk.

MPCC chuan kawngpui siam chungchangah pawh Fur ruahtui tlak nasat lutuk vanga kawngpui siam that hman loh a nih avangin kum 2018-a MNF sawrkar thar kha Congress sawrkar khan cheng nuai 8900 lai a hnutchhiah niin an sawi a. “Kan pawisa hnutchhiah hmanga kum 2019 chhunga MNF sawrkarin kawngpui a thawmthat (repair) bak kha tun thlengin State Fund atangin hmalakna liantham a awm lova, Kum 2019-a an kawngpui thawmthat (repair) ho pawh a chhe leh deuh vek tawh zawk a ni tih Minister hian lo hria se a duhawm hle,” an ti.

Minister Robert Romawia Royte in ‘Zoramthanga sawrkarah hripui leng chung pawh a hnathawh a chawl lo’ a tih pawh thubelhchian dawllo a ni tih MPCC chuan sawiin, “PAHOSS a Party mite duhsak nan a cheng nuai 100 chuang chuang a thlawn a mipui sum a sem ral te, SEDP Board enkawl nana tul lo tak a sum a kalral tir chur chur te, sawrkar hnathawk hlawh a hun tak a pek theih loh te leh kum khat chuang Health Care bill a bat sak te bak sawrkarin hmalakna liantham a nei lo niin Congress party chuan a ngai,” an ti a bawk.

Hetiang dawt chiang lutuk kan ramhruaituin mipuite a hrilh duh chu vanduaithlak an tih thu pawh an thuchhuah ah hian tarlangin, “A dik lohzia finfiah leh mai theih Minister ve meuhin an Party mipui kalkhawm hmaa a sawi hrehlo hi zahthlak a ti takzet a, an party mipui a ngaihmawlzia a lantirnaah kan ngai a ni,” an ti bawk.

Comments

Popular News (Last 30 Days)