Mizoram-a hri kai enkawllai sang khat aiin tlem ta

Mizoram-ah COVID-19 hri kai enkawl dam pung ve zelin nimin tlai thleng khan hri kai enkawllai pawh mi sang khat aia tlem an ni ve ta.

Nimin khan Mizoram-ah COVID-19 hri kai enkawl dam mi 302 an awm belh leh a, heti hian Mizoram-a hri kai hmuhchhuah tawh 2,23,856 zinga 2,22,258 te chu enkawl dam ni tawhin hei hi hri kai hmuh tawh atanga chhutin za zela 99.29 enkawl dam ang an ni a, hri kai enkawllai 917 la awmin hri kai zingah mi 681 an boral tawh a ni.

Pathianni khan Mizoram-ah Sample 448 enfiah niin hri kai mi 63 hmuh an ni a, Sample enfiah atanga chhutin za zela 14.1 te chuan hri an kai a ni. Pathianni-a Mizoram-a hri kai hmuhchhuah te hi Rapid Antigen Test hmanga hri kai hmuhchhuah vek niin District hrang hrangah Rapid Antigen Test hmangin Sample 446 enfiah a ni a, heng atang hian hri kai 63 hi hmuh niin Saitual District-ah 36, Aizawl leh Mamit District-ah 11 ve ve, Kolasib leh Lawngtlai District-ah mi pahnih ve ve leh Lunglei District-ah hri kai mi pakhat hmuh an ni. Pathianni khan ZMC leh Lunglei-a RT-PCR Laboratory-ah Sample enfiah awm lovin Fluorescent Immunoassay Test-in Aizawl leh Serchhip District-ah Sample enfiah a awm lo bawk a. District hrang hranga TrueNat Laboratory zingah Champhai District-ah Sample pahnih enfiah niin hri kai hmuhchhuah an awmlo bawk.