Latest News

MPCC in 'Chhim Hrut Fehchhuah' an nei tan

Kan ramin a mamawh ber chu Sawrkar tha a ni - Lalsawta

Mizoram Pradesh Congress Committee (MPCC) President Lalsawta chuan kan ramin a mamawh ber chu ‘Sawrkar Tha’ a ni tih sawiin, “Pathian leh mipui zara sawrkarna kan siam a nih a, kum 5 chhung mahni inhrek ngama sawrkar kan kalpui ngat chuan kan ram leh mipui pawh hi kan danglam ngei ngei ang tih hi kan ring tlat,” a ti.

Congress Party-in Mizoram chhim lam fanga zinchhuahna 'Chhim Hrut Fehchhuah' a buatsaih bultanna atana nimin-a Lunglei Press Club a thuthar thehdarhtute a kawmna ah he thu hi sawiin MPCC President Lalsawta chuan Sawrkar tha nei tur hian duhamna te, induhsakna dik lo te a bo vek a tul thu a sawi a, ram hruaitute hmathlir tâwmpui phak loh vànga dodálna te chu awm mahse ram leh mipui tâna a that dawn phawt chuan suttlang luih ngam huaisenna, Political Will (Ram leh mipui tâna tha tûr dodáltu engpawh su lui ngam tum ruhna') kan nei ang, a ti a. Congress Party chu an danglam tawh tih sawiin, “Pathian leh mipui zara sawrkarna kan siam a nih a, kum 5 chhung mahni inhrek ngama sawrkar kan kalpui ngat chuan kan ram leh mipui pawh hi kan danglam ngei ngei ang tih hi kan ring tlat. Minister leh MLA-te kan danglam chuan hmun hrang hranga kan Party hruaitute leh mipui pawh kan danglam ngei bawk ang,” a ti a ni.

Kan ram hian chhiat lam kan pan zel thei a, that lam kan pan thei bawk tih Lalsawta chuan sawiin, “Tunah hian a kawng dik zawh turin kan la tlai lo. Sum hmanga ram rorélnaa luh tumtute hi kan ram hmelma an ni a, mipuiin kan hnawl a ngai a ni,” a ti a, “Kan sawrkar a nih chuan 'Tang Puihna' hmanga thalai leh kuthna thawktute din-chhuahna tur kan buatsaih ang a, hei hian mihring rilru hruai dikin taimâkna leh rinawmna a hring ang,” tiin “Sawrkar Policy leh Programme hi Pathian leh a Kohhrante duh zawng anga tih kan tum ang,” a ti.

MPCC President chuan mipui hlim leh nuam ti taka an awm a, an dinchhuah theihna túr ram rorelna tha, 'That loh theih lohna Sawrkar' an siam ang tih sawiin, “That loh theih lohna bawm kan tih hi bawm tak tak a ni lo, 'Kalphung dik' sawina a ni,” a ti bawk.

Comments

Popular News (Last 30 Days)