Mizoram-a School 817-ah Sanitary Napkin Vending Machine bun a ni dawn

Mizoram-a School 817-ah Sanitary Napkin Vending Machine bun a ni dawn.

He thu hi Mizoram Samagra Shiksha hmalakna Sanitary Napkin Vending Machine leh Incinerator te hawnna nimin-a Govt. Mizo High School, McDonald Hill, Aizawl-a neih ah School Education Minister Lalchhandama Ralte chuan a sawi a, Education Minister chuan hetiang Vending Machine hi zirlai hmeichhia 25 chin awmna Sikul-ah pek theih a nih thu leh tunah hian School 817-ah bun a ni dawn tih sawiin, School dangah bun belh zel tum a ni a, School 1300 vel-ah dah tum a ni, a ti a. Sanitary Napkin Vending Machine leh Incinerator bun a ni ta chu lawmawm a tih thu pawh sawiin, he hmalakna hi hmeichhe naupangte phei chuan a tangkai hle dawn tih a sawi a ni.

Education Minister chuan hmeichhe naupangte hian mipate hriatpui loh harsatna an nei thin tih sawiin, mi zinga awm an hreh avangin School kal loh phah te leh School bansan phah thlengin an awm thin tih a sawi a, hetiang kawngah hian mipa naupangte pawhin hmeichhe naupangte dinhmun an hriatthiam theih nan zirtirtu bakah nu leh pa ten mawhphurhna pawimawh an nei a ni, a ti a. Sanitary Napkin Vending Machine chu khawl man to a nih avangin School neituten lo enkawl uluk a, lo vawng tha turte, khawl dahna turah hmeichhe naupangin an pan hreh lohna tur hmun te thlan tul a tih thu a sawi tel bawk.

He hunah hian Samagra Shiksha-a Dy. SPD VL. Malsawma chuan Sanitary Pad Vending Machine chu Elementary School 547 leh Secondary leh Higher Secondary School 270-ah dah a ni dawn tih a sawi a. Heng khawl te hi District 7-ah phurh thlen a ni tawh a, District dangah pawh phurh thlen thuai tum a ni tih a sawi bawk a. Adolescence Health and Hygiene programme-ah hian Vending Machine bakah tleirawlte tan hriselna leh invawn thianghlimna kawngah Awareness Campaign neih tura ruahman a ni tih a sawi bawk.

Nimin a he hun hman hi Samagra Shiksha State Project Director Lalhmachhuana chuan kaihruaiin tleirawl te nunah thil inthlak danglam tam tak awm thin chungchangah zirtir tur, nu leh pa leh mipui vantlang in hriattur leh zirtur an neih te pawh tarlan a ni bawk.