SBI in AVBD hnenah thisen pekna hmanrua hlan

State Bank of India (SBI) chuan Corporate Social Responsibility atangin nimin khan Association for Voluntary Blood Donation (AVBD) General Hqrs. hnenah thisen peknaa hman tur hmanrua leh bungrua chi hrang hrang Rs. 2,51,000/- hù an hlan.

Heng bungrua hlanna puala inkhawm tawi Civil Hospital, Aizawl Medical Superintendent Office kawt-a neih ah Health & Family Welfare Board Vice Chairman Dr. ZR. Thiamsanga MLA chuan AVBD hmalakna leh inpekna chu ropui a tih thu sawiin, “Mahni hna kalsanin in thawk a, Mizoram in Covid-19 vanga hun harsa tak a tawh laiin thisen pe turte kan tlâkchham laiin rim tak leh taima takin in thawk a, nunna tam tak in chhanhim a ni,” a ti.

He hunah hian SBI Regional Manager LP. Lalchangkima chuan, SBI-in an theih ang angin Covid-19 dona atan bungrua an pe thin tih a sawi a, “Tunah pawh hian kan la kalpui zel a, ICU khum pawh 50 kan chah a, tunah hian a rawn thleng tawh,” a ti bawk.

Nimin-a SBI-in AVBD hnena bungrua an hlan te hi Digital Blood Pressure Monitor 15, Inbukna (weighing scale) 10, Mttress 30, Lkham 30, Bedsheet leh lukham káwr 30 ve ve, Plastic Chair leh Steel Almirah pakhat a ni a, heng bungrua te hi AVBD President C. Lalnunema chuan a dawng a ni.