CAG Report-ah SIHM chungchang tarlan a ni

Tunhnai a Comptroller and Auditor General of India (CAG) Audit Report Assembly House dawhkan-a dahah chuan Tourism Department-in cheng vbc. 8 senga State Institute of Hotel Management an din chu kum 7 hnuah pawh hawn a la ni lo tih tarlan a ni.

CAG Report-in a sawi dan chuan hetianga hman tangkai a nih loh chhan hi zirtirtu leh hnathawk dang lak a nih loh vang leh zirna hmanrua tur ruahman tel a nih loh vang a ni a. October, 2007 khan sawrkar laipui Ministry of Tourism chuan Bung Bangla hmun a State Institute of Hotel Management dinna atan hian cheng vbc. 10 ruahman chu a pawm a. He hna hi kum 2 chhunga thawh zawh tur niin SIHM hi Mizoram Societies Registration Act, 2005 tlawhchhanin August, 2008 khan ziahluh a ni a, a In sak hna thawk turin PWD chu mawhphurhna pek niin pawisa pawh PWD hnenah suan a ni.

Kum 2020 May thla thleng khan SIHM-ah hian zirna tan a la ni lova, a chhan ber chu zirtirtu leh hnathawk dang lak an nih loh vang a ni a. He institute building sak hna pawh hi September, 2009 a zawhfel tura tih a nih laiin September, 2013 khan PWD hian an sa zo chauh a. Kum 2015 May thla khan a building-te hi Tourism Department hnenah an hlan a ni.

January, 2013 thla khan Tourism Department chuan he Institute a thawk tur Principal, zirtirtu leh hnathawk dang 22 tana post siam turin rawtna a siam a, DP&AR chuan hna siamthar tur hi 19-ah titlemin August, 2019 khan Mizoram sawrkar chuan he institute a hnathawk tur hi post 32 siam a remti a. Hetihlai hian he institute a zirlaite zirna hmanraw leina tura Ministry of Tourism in cheng vbc. 2 a ruahman chu Mizoram Tourism Department hian a bawhzui ta lo hrim hrim niin CAG report chuan a tarlang.

October 2019 khan helai hmun hi enfiah niin hetianga cheng tam tak senna hman tangkai lohva a awm chhan hi ruahmanna fel siam a nih loh vang a nih thu CAG Report chuan a tarlang a. Tunah hian zirna tan mai a nih theih loh pawhin a building a rawih zel lohna turin sawrkar in hman tangkai dan zawng se tiin rawtna a siam nghal a ni.