Latest News

Kum 2021-ah Cyber Crime thubuai 470 vel ziahluh niin pawisa lam kaihhnawih 70% vel a awm

Kum kalta (2021) khan Mizoram-ah Cyber Crime kaihhnawih thubuai 470 vel ziahluh awmin chung zinga 70% vel chu pawisa lam kaihhnawih a ni.

He thu hi Mizoram Police hnuaia hnathawkte mi 38 tana ni 3 awh tur Cyber Crime hnuhma chhuina training hawnna inkhawm nimin-a neih a hmanpuina ah Home Minister Lalchamliana chuan a sawi a, Home Minister chuan Information Technology thang chakin a rawn ken tel chu Cyber Crime a nih thu sawiin, helama thiamna a san ang zelin Cyber Crime pawh hi a pung chak a ni, a ti a. CID (Crime) Branch in an record danin kum 2021 khan Mizoram bikah Cyber Crime case 470 vel ziahluh niin chung zinga 70% vel chu pawisa lam kaihhnawih a nih thu a sawi a. Cyber Crime te chu thiamna bik kan nei a nih loh chuan tih vak ngaihna a van thu leh chhuichhuah leh in man te a har thu a sawi a. Chuvangin kan dona hmanrua hmasa ber tur hemi kawng thiamna kan neih leh chu thiamna tihpun a ni tih sawiin, National Institute of Electronics & Information Technology (NIELIT) Aizawl in Police leh Law Enforcing Agency te mamawh tak mai pakhat Digital Forensics leh Cyber Crime lama training te pe thei tura hma an lak pui thei chu lawmawm a tih thu a sawi bawk.

Home Minister chuan Sawrkarin Cyber Crime chungchang chu a ngaih pawimawh avangin tunhnaiah Mizoram Police te, Forensic Science Laboratory te, Digital Forensics leh Cyber Crime lam beihletna kawngah Sawrkar a in buatsaih chho nasat thu a sawi a. Chungte chu Mizoram Police hnuaiah Cyber Crime Police Station din te, Cyber Crime Prevention against Women and Children (CCPWC) Project hnuaiah Cyber Forensic Lab-cum-Training Centre din te leh Forensic Science Laboratory ah Cyber Forensic Lab hawn tak te a nih thu a a sawi bawk.

‘Beginner Level of Digital Forensic and Cyber Crime Investigation with Hands-On’ tia vuah he training hawnna hun hi NIELIT Director (Incharge) T. Gunendra Singh chuan a kaihruai a, sawrkar laipui pawhin Cyber Crime lo pung chho zel hi veiin hmalakna hrang hrang a kalpui a. Heng zingah hian Ministry of Home Affairs chuan Indian Cyber Crime Coordination Center (I4C) a din a, Awareness Day /Cyber Jagrookta Diwas pawh thla tin Nilaini hmasa berah hman thin tura tih a ni a. Cyber Jagrookta Diwas hi Mizoram-ah pawh hman chhoh ve mek a niin mipui nawlpuiin an en tur TV lama programme hrang hrang te, College leh Sikul lamah pawl hrang hrang ten an hriatthiam tawk tur ang zela zirtir tur tein ruahmanna siam mek a ni.

Comments

Popular News (Last 30 Days)