TB umbo tura beihpuithlakna ‘Aashwasan Campaign’ Serchhip District-ah kalpui a ni dawn

India rama TB natna umbo beihpui thlakna atana hmalakna ‘Aashwasan Campaign’ chu Serchhip District-a kalpui turin nimin khan Serchhip-ah a hawnna neih a ni a, he hmalakna hnuaiah hian ni 100 chhungin ngawrh taka hmalak a ni dawn a ni.

‘Aashwasan Campaign’ hawnna Serchhip District TB Centre tual-a neih ah hian Serchhip CMO Dr. Lalzawmi chuan Woirld Health Organisation (WHO) chuan kum 2030-ah khawvel pumah TB umbo tuma hma a lak thu leh India ramah chuan kum 2025-ah umbo turin sawrkar in hma a lak thu a sawi a, hemi atan hian ramchhungah kawng hrang hranga hmalak mek a ni tih sawiin, he hmalakna atan hian ramchhunga Tribal te chenna District 100 thlangchhuakin heng zingah hian Serchhip District chu a tel thu leh heng District-ah te hian ‘Aashwasan Campaign’ hi kalpui a ni tih a sawi a. Heng District thlanchhuah zingah hian Mizoram-a District 8 te pawh telin, tunhnaia District thar pathum te pawh a hmaa an District awmna ah la telin hmalakna hi kalpui a ni dawn tih a sawi.

Serchhip CMO chuan Zawng hri (Small Pox) chu khawvel pumah umbo a nih tawh thu leh Zeng hri pawh India ramah chuan umbo a lo ni tawh tih sawiin, tunah hian TB bakah Measles-Rubella te pawh umbo tura hmalak mek a ni tih a sawi a. TB natna hi langchhuak lova lo vei ru reng awm theih anih avangin TB natna veite zawnchhuahna tura hmalak hi a tul thu sawiin, thawktute pawhin thahnemngai taka he hmalakna hi an thawh a tul thu a sawi bawk a ni.

He hun kaihruaitu Serchhip District Medical Superintendent Dr. ZD. Lalmuanawma chuan he hmalakna in a tum ber chu TB veite hmuhchhuah leh enkawl a nih thu leh chumi tur chuan ni 100 chhungin Plan mumal tak hmanga Survey neih a nih tur thu a sawi a, TB vei te rang taka hmuhchhuah leh enkawlna pek vat chu a pawimawh avangin he hmalakna hi kalpui a ni tih sawiin, TB chungchang inhrilhhriat chu he hmalakna in a tum pawimawh tak a nih thu a sawi bawk.

He hunah hian Serchhip TB Centre-a DoT-Plus Supervisor H. Laltanpuia chuan TB chungchanga Serchhip District dinhmun tlangpui tarlangin, kum kalta 2021 (Jan. - Dec.) chhung khan Serchhip District-ah TB vei mi 66 hmuhchhuah anih thu leh chung zinga mi 45 te chu Chuap TB midang kai chhawng thei an nih thu te, Chuap pawnlam-a vei mi 21 an awm thu leh mi 4 in an thihpui thute bakah mi 52 in tha taka TB damdawi an ei zawh thu a sawi a. Kumin January thla atanga tun thlengin Serchhip District-ah TB vei mi 14 hmuhchhuak tawhin chung zinga mi 9 te chu Chuap TB leh Chuap pawn lam mi 5 awm thu bakah mi pakhatin TB natna a thihpui tawh thu te a sawi bawk a. Kum 2003 atanga Vawiin thlengin Serchhip District-ah TB vei mi 1348 hmuhchhuah ni tawhin an zinga 22 te chu MDR-TB an nih thu a sawi bawk.

‘Aashwasan Campaign’ hi RD Block pahnih-a kalpui tur niin thawktu mi 5 an awm dawn a, heng mite leh an hnathawhna tur Motor te chu CMO hian a vailiam nghal a ni.