Lengpui Airport hnathawh endik hma chuan chawlhsan rih turin BJP in an phut

BJP Mizoram Pradesh Central Schemes Monitoring & Vigilance Cell chuan Lengpui Airport-a hnathawh te chu tun dinhmun leh nakin hun atan mipui tana him tawklo ah an ngai tih sawiin, endik a nih hma chuan chawlhsan rih tura an phut thu an sawi.

Nimin khan BJP Mizoram Pradesh Central Schemes Monitoring & Vigilance Cell chuan Aizawl Press Club-ah thuthar thehdarhtute kawmin tun thla ni 15 khan Lengpui Airport hnathawh lai chim chu a hmunah kalin an enfiah tih sawiin, “He thil thlenga mawhphurtu chu Finance leh PWD changtu Chief Minister Pu Zoramthanga a ni,” an ti a. Lengpui Airport hnathawh lai chim chu India rampuma thil zahthlak, Mizoram mipuite tana thinrim thlak a ni tih pawh sawiin, “Tuna Airport Cute siam tumna kawnga Iron & Steel Structure, Cement Concrete Ban, Beam, Slab awm tawhsa bakah, bungraw hman tur thlenga mithiam ten an endik hma chu hna zawng zawng chawlhsan rih turin kan phut a ni,” an ti.

Aviation Department - Airport leh Thlawhna Service hi sawrkar tana mipui sum khawhralna hautak tak a ni tih sawiin, Central sawrkar pawhin Disinvestment/Sum khawhralna Sector tiin mimal enkawl turin a dah deuh vek tawh tih an sawi a, “State rethei Mizoram Sawrkar in Lengpui Airport a enkawl pawh hi hlawkna neilo kumtin mipui chhiah pek tlingkhawm Budget atanga cheng nuai 350 khawhralna a ni a, ngaihtuahna fim tak hmanga ennawn tul a ni,” an ti a. COVID-19 hripui leng avangin Central sawrkar chuan State tin mipuite ei leh bar a harsatna an tawhna atanga chhanchhuahna tur Special Central Assistance hnuaiah a pung awm lo in State tin te loan min pe tih pawh sawiin, “A hmanna tur pawh tinzawn sa neiin mipui dawmkanna tura hnathawh tur siam tam leh hnathawkte awlsamna tur siam sakna tur a ni. He Scheme hnuaiah ringawt pawh Central chuan Mizoram sawrkar hnenah cheng nuai 50,000 a pe a. Hemi atang hian Lengpui Airport Cute siam nan cheng nuai 5041 ruahmanin Phullem phah, Hall sak, Police lal Office Building sakna etc. atana a hmang hi mipui mamawh hmasa ber nilo leh thil tul hmasa rihlo a ni,” an ti bawk.

BJP Mizoram Pradesh Central Schemes Monitoring & Vigilance Cell hruaitute chuan Lengpui Airport chungchanga an thil hmuh leh hriat te hi ziakin Chief Secretary; Ministry of Civil Aviation; sawrkar laipui-a National Disaster Management Authority leh Mizoram sawrkar-a Department of Disaster Management & Rehabilitation bakah pawisa petu Central Finance Ministry-ah te Complaint thlenin hna kal lai mek pawh endik anih hma a chawlhtir turin an ngen dawn bawk tih an sawi a ni.