Non-NFSA a APL ration buhfai man tihsan tum

Mizoram sawrkar chuan buhfai-a sawrkar sum hloh nasa lutuk tihzia awmna turin Non-NFSA (National Food Security Act) hnuaia Ration Card (Card var) hmangtu ten buhfai an khulna man chu tihsan tumin ruahmanna a nei mek a, tihsanna tur zat erawh bithliah fel a la ni rih lo.

Thudawn danin, Food Civil Supply & Consumer Affairs Department chuan tun dinhmun a Card var/Above Poverty Line (APL) hmangte hnena buhfai hralhna kg. ah Rs. 15 chu tihsan tumin rawtna a nei a, Card var hmangte khul tur buhfai Department in State pawn atanga a leina chu kg ah Rs. 27.50 a nih laiin, Retailer atanga an khulna erawh kg. ah Rs. 15 a ni.

APL ni lo, Scheme dang AAY (Card eng), PHH (Card hring/pawl) hmanga retailer atanga buhfai khulte chu central sawrkar in man tlawm a buhfai an khulna tur (Subsidy rate) ruahmanna a siam fel sa vek a, hetihlai hian Card var hmangte buhfai khultirna man tihsan a nih chuan buhfai leina a sawrkar sum hlohna tam tak a phuhruk theih beisei a ni a. Card var/APL Scheme bik hnuaia Ration Card hmangtute chungchang chu state sawrkarin mipuite dinhmun thlira a kalpui niin, Card var hmangtute buhfai khulna tur rate pawh state sawrkar in ruahmanna a siam tur a ni.

FCS&CA chhinchhiah danin, Mizoram-a Ration Card awm mek 2,79,531 zingah National Food Security Act (NFSA) hnuaiah AAY (Card eng) 25,751 awmin, chung Card a hming chuang zat chu 64,956 an tling a. PHH (Card hring/pawl) 1,39,832-ah hming 6,01,092 chuangin, Non-NFSA (card var) 1,13,948-a hming chuang zat chu 4,94,778 an tling a ni.